Mabuhi si Judge Peras!!!

Akong daygon si Judge Soliver Peras nga mikonbikto sa walay kukahadlok ni Kongresista Ruben Ecleo Jr. sa pagpatay sa iyang asawa nga si Alona Bacolod-Ecleo napulo ka tuig na ang nakalabay.

Tinuod, peligro karon ang kinabuhi ni Judge Peras kay nasayud ko nga daghang mga sakop sa Philippine Benevolent Missionaries Association (PBMA) nga molaban g’yud sa ilang giila nga “supreme master.”

Ang nakaayo lang ni Peras kay opisyal siya sa Military Reserve Command ug gitugotan siya nga makahupot og armas. Gani gitug-anan ko sa akong mga kauban nga kanunay’ng gatangkil si Peras og armalite rifle.

Dili nato mabasol si Peras nga mohimo niini kay kanus-a pa man diay siya manguros, unya na ba kun maigo sa kilat? Ambot bitaw, naglibog ko sa ubang sakop sa PBMA nga pwerte man nga makalaban sa ilang master.

Wala ba diay kamo malooy sa iyang asawa nga iyang gipatay? Pito ka huwes ang nagbanos-banos sa pagdumala sa husay sa kaso ni Ecleo. Dili ra kay si Peras ang nagtoo nga sad-an si Ecleo.

Wala lang gayud hinoon makapakanaug og hukom ang ubang huwes kay human gikwestyon nga sila midapig sa prosekusyon, mihukom man sila nga magpahulip.

Ikapito na nga huwes si Judge Peras nga mihupot sa maong kaso. Swerte lang nga si Peras usa ka military officer mao nga duna siya’y igong kaisog sa pag-atubang sa kakuyaw sa iyang paghupot sa kaso.

Tambag nako sa mga sakop sa PBMA nga ayaw kaayo kamo pagpalabi sa inyong pagbati, basaha ang kaso o paminaw sa mga announcers sa radyo nga mohisgot sa isyu.

Kun dili pa sad-an si Ecleo, nganong mitago man siya? Pananglit ako pa si Ecleo ug wala gayud ko’y sala, ipakita nako nga andam ako nga magpabilanggo. Sa ingon niini nga paagi, mas modayeg pa kanako ang akong mga sakop.

Wala ba kamo mahinumdom dihang gidakop sa kapolisan si Ecleo didto sa iyang mansyon sa Dinagat, Surigao nga ang iyang mga sakop misukol usab? Sa maong higayon daghan sa iyang mga sakop ang napatay, ug duna sa’y mga polis.

Kapila ra may pagmando sa iyang mga sakop nga dili mosukol sa mga polis kun gusto pa lang gayud siya nga magpadakop.

Suheto kaayo ko sa grupo sa PBMA kay sayong bahin sa dekada 80, duna ko’y mga higala ug ig-agaw g’yud gani nga nahimong sakop niini ug maoy motug-an nako unsay ilang mga himoon sa ilang tigum.

* * *

Gitataw g’yud ni PNP Chief Nicanor Bartolome nga dili tukma ang pag-abli sa baggage compartment sa mga sakyanan, apil na ang U-box sa mga motorsiklo panahon sa mga police checkpoints.   

Tinuod, pero alang sa mga tawo nga walay gitagoan nganong mahadlok man nga ipakita ang inyong mga baggage compartments? Dili ba diay kamo malipay nga luwas kamo diha sa karsada?

Klaro man kaayo nga armas ang tumong sa kapolisan nga pangitaon aron mapugngan ang dautang binuhatan sa mga tulisan. Angay kita nga mo-kooperar sa mga polis.

Mas malipay gani kita nga subsob karon ang pagpahigayon og checkpoint sa atong mga polis kay sa ingon nga paagi, mahadlok ang mga dautang elemento nga magdala-dala og armas kay basin masakpan.

Ako bitaw kun makaagi og police checkpoint, mohunong g’yud ko. Aw, wa man g’yud hinoon ko’y illegal nga gidala-dala.