EDITORYAL- Ang gipangayong umento sa suweldo

Matag tuig nagsaka ang presyo sa mga baligya nga nagkahulogan sa padayong pagkahibus sa panudlanan sa matag pamilya kansang kinitaan gibase lang sa minimum nga suhol nga gimbut-an sa balaod.

Sa magdawatan ra ba og suhol nga minimum, wa gyuy higayon nga may mahipos nga subra sa makobra nga suweldo inig-abot sa kinsenas ug sa katapusan sa buwan.

Busa sakit man palandungon sa tag-iya ug tagdumala sa trabahoan, apan tungod kay mao kini lakaw sa panahon , di gayud kalikayan nga mapugos pagtuman ang tanan alang sa kahapsay sa dagan sa ekonomiya sa nasud.

Anha man gud magsugod ang kagubot kun ang mga mamumuo hikawan sa ilang gipangayong umento sa suhol.

Daghan kaayong mosakay nga grupo aron hasulon ang tagdumala sa usa ka trabahoan, busa aron kalikayan ang kasamok kasagaran sa tagdumala makig-alayon nalang sa mga otoridad sa pamuo aron sayron kun pila ang angay ihatag nga umento sa suhol sa mga trabahante.

Hinuon sa pagkakaron murag di na kaayo sagkaon alang sa mga tag-iya sa trabahoan ang paghatag og usbaw nga suhol sa ilang mga mamumuo.

Kay ang tanan na-edukar na sa tukmang leksyon, gikan sa mga tinugyanan sa pamuo, sa tagdumala sa trabahoan, ug sa mamumuo kinsa   matag tuig nasinati sa di malilong nga pagsaka sa presyo sa mga palaliton.

Busa ang usa ka kompaniya nga gipadasgan sa mga trabahante, di makabalibad kun mangayo na og umento sa suhol ang maong mga trabahante.

Hinuon tungod sa gitukod sa goberno nga Regional Tripartite Wages and Productivity Board, kontrolado ang lihok sa mga mamumuo ug di sila makapatuyang sa ilang gustong gidak-on sa usbaw tungod kay ang maong  isyu plantsahon mang daan sa lamesa nga kuymehan sa goberno.

Busa tungod ning maong sistema, wa na mabaniog kaayo ang isyu bahin sa welga sa mga mamumuo. Di    ba?