Sa kamoderno sa atong panahon, ang tawo miduyog usab sa kahaytek na sa atong mga kahimanan naglakip na sa pag-atiman sa kaugalingong lawas. Mag-inilogay sa karsones ang babaye ug lalake. Sa tanang butang way li-atan mag-inindigay, dili kaako nga maiwit o mabentahaan sa mga diskarte sa kinabuhi.
Magpalabwanay sa abilidad kun kinsay mas gwapa o gwapo o macho.
Unya naa poy lalake, magpakababaye ug ang babaye magpakalalake. Di na ni ikahibung kay katumanan kining gikulit diha sa atong bag-ong panahon.
Grabe ang kompetisyon sa pag-areglar sa nawong. Ipausab ang dagway nga hatag sa kahitas-an, aron ludhan sa pagdayeg ang imitasyong katahom. Ang uban sad tawong medyo may kunot na, palihaan sa parlor aron mahamis ug batan-on na tan-awon aron padayon nga hangopon sa katilingban.
Unsa man ang kahimtang sa atong panagway, mabati man o manindot, angay natong ikapasigarbo kay mao may gihatag sa Dios kanato. Ang tinuod nga katahom wa sa pisikal nga dagway kundili anaa sa kinatibuk-an mong pagkatawo. Ang kalumo o kaanindot sa imong kinaiya o gawi, di malabwan sa katahom nga makita diha sa matentalong mga mata.
Ang katahom sa usa ka binuhat, magdepende ka na sa tumatan-aw. Kun masinabuton, matinabangon, buotan di tigpakaaron ingnon, nagpakabana sa ikatampong kaayohan sa isigkaingon, ang imong nindot nga batasan, alang sa katawhan ikaw ang kinagwapahan ug way makailog diha sa mga kasingkasing nga nadani sa imong talagsaong hiyas sa imong pagkatawo.