Gubot pas lukot

Tungod sa walay kooperasyon sa katawhan nga misaksi sa pagpalansang ni Gilbert Bargayo sa krus, nahimong gubot ang maong kalihukan.

 Ang crowd control group napakyas pagkontrolar sa mga tawo tungod kay wala man g’yud sila maningkamot nga mapugngan ang mga tawo nga modam-ag duol sa krus.

Pagsugod sa Siete Palabras, nindot kaayo paminawon kay mga tawo nga batid nga mobatbat sa katapusang pito ka pulong sa Ginoo ang ilang gikuha. Naglakip kini sa mga inila nga dramatorgo sa radyo.

Apan diha nga miabot na si Bargayo ug giandam na ang krus aron siya ilansang, wala na magpapugong nga mihasmag ang mga tawo duol sa nahimutangan ni Bargayo.

Ang una nga nakaaghat sa mga tawo nga moduol sa krus mao ang grupo sa mga photographers nga mipaduol aron pagkuha og hulagway ni Bargayo.Sa ingon niadto nga kalihukan, ang mga photographers hatagan g’yud unta og lugar nga anha ra sila kutob dili kay babagan nila ang mga tawo nga makatan-aw sa kalihukan.

Laing leksyon mao nga ang ingon niadto nga kalihukan angay g’yud nga gamitan og puthaw nga railings aron walay makaduol sa krus nga mao ray magdala sa kagubot. Ang mga tawo usab nga nagpaduol sa krus, wala makontinto nga gisalipdan nila ang mitan-aw lang sa layo ug nagpabilin nga nagbinuotan, gibukhad pa g’yud nila ang ilang mga payong ug misamot nga dili na makita si Bargayo.

Nakapanglingo-lingo ko nga nagpalandong sa maong sitwasyon. Unsaon, kadtong mga tawo nga naghimo niadto mao ra man g’yud intawon ang naabot sa ilang huna-huna. Wala man sila makasabot unsay epekto sa ilang gihimo.

Basta kay “gubot pas lukot” ang maong kalihukan. Ang pakigpulong sa mga mamumulong sa Siete Palabras nagkaputol-putol kay ang wire sa microphone nagsigi og kaputol.

Unsaon nga wala man nila andama daan nga sa ibabaw unta ipaagi ang “wire” aron dili matamak-tamakan. Ang konsehal nga nagdala sa Peace and Order daku man unta og lawas, apan utro pa nga misalipod sa nanan-aw.

Ang nakapahimo nga kataw-anan kay dihang natumba ang microphone, ang mibatbat sa ikapito nga pulong, nakahimo og dakung sayop. Sa kahilakon nga tingog misinggit siya “Anaa! Tan-awa ninyo si Jesus, Himatyon na nianang Krus!”

Apan dihang kalit lang natumba ang microphone paingon kaniya, misinggit siya og “Panuway!” Tarong ba ang iyang gibuhat? Alang nako daku kadtong sayop ug kun ako pa ang nakahimo, manaug ko dayon sa stage nga magsampong sa akong nawong sa kauwaw.

Apan pasalamatan nako si Kapitan Elmer Abella nga akong higala. Nakasabot ko nga buot g’yud unta siya nga mahapsay ang kalihukan apan kuwang lang og pag-abag aron mapahapsay unta ang kalihukan.

Daygon usab nako si Higala Gilbert Bargayo sa iyang pagsakripisyo pagpalansang sa krus. Dunay uban nga miingon nga daku ra kuno si Bargayo nga mahimong Jesus.

Gitubag nako ang babaye pinaagi sa pag-ingon. “Unsaon, dunay uban nga gagmay og lawas sama adtong iyang bana nga kauban kinsa taas usab og buhok, talawan man nga magpalansang.” Nahilom siya.

* * *

Buyno, karong adlawa mao ang sugat sa pagkabanhaw. Ayo-ayo mo ha? Daghan g’yud karon ang mangaligo sa dagat. Bantayi pag-ayo ang inyong kabataan kay basin og ang atong paghapi-hapi mosangpot na hinoon og kagul-anan.