Naglainlain nga kinaiya ug pagtuo sa Ginoo

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Magtapok sa pagtambong ang mga relihiyosong Katoliko sa pagtambong sa mga kalihokan sa simbahan nga gihan-ay sa atong kaparian niining mga adlaw sa Semana Santa nga maoy atong paghandum sa pagbangutan sa kamatayon ni Ginoong Hesukristo nga gilansang sa Krus didto sa Kalbaryo.

Hinuon nagkalainlain ang kinaiya sa tawo sanglit adunay giingon nga sa mga nanambong sa kalihokan sa simbahan sama sa misa nga gihimo sa kaparian, Bisita Iglisiya, pagrosaryo ug uban pa.

Ang mga tawo nga naghimo niini nabahig na hinuon sa tulo ka matang sa gibatonan nilang kinaiya sa ilang pagtuo ngadto sa atong Labaw’ng Makagagahom.

Matud pa nila nga adunay kinaiya sa tawo nga Diosnon apan dili hinimba ug motambong lang og misa sa panahon sa Semana Santa ug adunay dili Diosnon apan hinimba ug matag Domingo kining motambong sa misa.

Adunay nag-ingon nga adunay tawo nga kanunay nga mosimba ug maayong maminaw sa wali sa pari apan sa iyang paggawas sa simbahan daw dili na mahinumdom sa giwali sa pari kay ang tanan niining nabati gipalapos lamang sa luyo niining dunggan.

Samtang lahi usab ang kinaiya sa usa ka tawo nga bisan sa daklit lang nga pagpaminaw sa wali sa pari maayo kaayong motuhog sa iyang pagtabi sa pagtulun-an sa Ginoo apan wala buhata sa iyang pagpakabuhi.

Ang laing kinaiya sa tawo nga hinimbahon ug gipaminaw ang mga wali sa pari ug ang matag pulong nga iyang nabati iyang gitipigan sa kahiladman ug kanunay niining gisunod ug gisubay ang gilatid nga mga pagtulon-an.