Balaang semana

Hangtud karon, nahimo gihapon sumsuman sa publiko ang pagbabag sa kadagkuan sa St. Theresa’s College sa pipila nila ka tinun-an nga makapaso sa ilang graduation. Ang giingong law-ay nga mga hulagway sa mga tinun-an nga napatik sa social networking site ang hinungdan nganong nangusog ang mga madre nga dili makapaso ang mga tinun-an. Kun ang mga madre ang paminawon, dakong pagsupak sa ilang student manual ang gihimo sa mga high school student. Apan alang sa mga ginikanan, di’ igo ang gibuhat sa ilang anak aron ihikaw ang usa ka katungod nga gipaningkamotan sa mga bata nga maangkon su’d sa milabay nga upat ka tuig sa sekondarya.

Managlahi ang baruganan sa publiko, apan naghiusa ang tanan sa pag-ingon, adunay kasaypanan nga nahimo ug matarong lang nga adunay silot nga himuon. Managlahi man ang panlantaw sa katawhan apan susama ang obserbasyon nga adunay katungod nga mopahamtang sa silot apan adunay korte nga adunay katungod sa paghubad ug pagpahamtang sa silot. Managlahi man ang prinsipyo apan kun buot tan-awon ang kaayohan sa mga batan-on ang mas labaw nga gipatigbabaw sa duha ka managlahing habig. Ang mga ginikanan mao ang paghatag og dungog sa ilang mga anak luyo sa mga kasaypanan ug ang mga madre ang paghatag og leksyon sa kasaypanan aron makat-on ang mga bata sa pagbalik sa da’n nga matarong.

Karong semana santa, maayong sugilanon nga hinuklogan ang mga panghitabo sa STC.   Luyo sa kasaypanan nga nahimo sa katawhan, adunay usa ka tawo nga ni-sakripisyo sa iyang kaugalingon ug nisugal sa iyang kinabuhi aron mahigmata ang tanan sa ilang mga kasaypanan ug mobangon human sa mga pagsuway. Si Arsobispo Jose Palma sa iyang mensahe nag-ingon nga mas maayong mobangon ang mga tinun-an human sa pagsuway nga ilang nahiaguman. Tukma lang nga mobangon tungod kay kung wa’ pa siguro ang gipahamtang nga mga silot, di’ mahatagan og katumanan ang mga regulasyon nga gipahamtang sa tunghaan su’d sa dugay nang katuigan.

Ang sugilanon sa mga tinun-an sa STC di’ na bag-o diha sa mga tunghaan, ang nakalahi lang, gi-piyestahan sa media ug gisaw-an sa publiko ang nahitabo kanila. Karong semana santa, mas maayong tan-awon ang isyu sa mas lapad apan mas duol sa atong kasing-kasing nga paghubad sa sitwasyon. Sa matag kasaypanan nato sa matag adlaw, adunay mga silot nga nagpaabot apan mas mopatigbabaw ang pagmahal ug pagpasaylo sa kahitas-an. Adunay mga lagda nga angayan nga sundon sa atong kinabuhi nga mahimong mapatik sa duha ka mahinungdanon nga sugo. Tahuron ug higugmaon ang Ginoo sa tibuok kasing-kasing ug kalag ug tahuron ug higugmaon ang isig ka tawo sama sa imong paghigugma sa kaugalingon.

Daghan ang nag-ingon lisud ang da’n nga matarong tungod kay nagpasabot ni og sakripisyo sa kaugalingon.   Apan mas lisud ang pagsunod sa matarong tungod sa tentasyon sa dautan nga usahay o sa kanunay mas lami, mas makalipay ug mas makahatag og katagbawan kanatong tanan. Apan kalipay nga makuha sa material nga butang, temporary lang tungod kay ang tinuod nga katagbawan anaa sa langit uban sa Ginoo. Ang maong saad sa wa’y kinutubang paghigugma ug pagtahod, gipahinumdum kanato sa matag semana santa sa matag tuig. Ang panaad sa kalipay nga wa’y katapusan atong gipundohan sa atong mga maayong buhat sa matag adlaw. Di’ lang silot ang atong pagpuyo sa kalibutan apan anaa sa pagsunod sa balaod sa kinabuhi ug pagtahod sa atong kaugalingon, sa uban ug sa kahitas-an.

Email: [email protected] or [email protected].