Vendors gihimong gatasan?

Maayo kay wala mahadlok ang mga opisyal sa Cebu City United Vendors Association (CCUVA) sa hagit kanila ni Kongresista Tomas R. Osmeña nga mohimo sila og kwentada sa gikolekta nila nga “monthly dues” gikan sa mga vendors.

Angay lang g’yud kay nagduda si Tommy nga gihimo lang “gatasan” sa mga opisyal sa CCUVA ang mga vendors kay ang gikolekta kanila nga monthly dues posible nga gigamit sa dili tukma nga kagamitan.

Si Ermita barangay konsehal Felicisimo “Emok” Rupinta nga maoy nagtukod sa CCUVA pipila ka tuig na ang nakalabay ug karon nagsilbi nga adviser sa grupo, miingon nga wala sila mahadlok.

Gihatagan ko og mga inpormasyon ni Rupinta kabahin sa CCUVA. Matud niya nga miabot na karon og 16,000 ang ilang sakop nga miyembro sa 176 ka lainlaing vendor groups.

Ang labing daku nga kahugpongan sa mga vendors nga nagpasilong sa CCUVA mao ang Landing Area Vendors Association (LAVO) nga anaa maninda sa Carbon Market area.

Ang matag vendors nagbayad og P10 ngadto sa ilang tagsa-tagsa ka kahugpongan. Unya ang kahugpongan (depende sa gidaghanon sa ilang mga sakop), mobayad usab og monthly dues ngadto sa CCUVA gikan sa P300 ngadto sa P600.

Si Rupinta miingon nga matag buwan mokolekta ang CCUVA og P11,000 nga monthly dues gikan sa lainlaing vendors group. Anhi nila kuhaon ang allowance sa ilang staff ug ubang gastohan.

Dili kuno tinuod nga ang CCUVA mangolekta gikan sa matag vendor. Sa ato pa, ang daku og makwarta ang kahugpongan. Mao diay kini ang rason nga dunay mga vendors’ group nga makahatag og allowance sa usa ka tawo nga sagad nila molaban sa City Hall.

Buyno, maayo tingali nga mohatag ang CCUVA og dukomento sa media. Kun gusto sila, diri nako mahimo ra usab kay ako may nagsunod niining maong isyu.

* * *

Nangangkon si Rupinta nga ang 16,000 nila ka sakop nga tindera dili na g’yud mosuporta pa ni Tommy kay mahulog man nga giaway sila sa kongresista.

Kini hinoon mora’g dili usab tanan g’yud ang mobiya na lang kang Tommy. Sigurado ko ana nga dunay mga tindera nga dili mouban sa ilang mga pangulo.

Ingon niini ang politika. Kaniadto, sila si Rupinta ug Maria Pino nga karon maoy pangulo sa CCUVA mga suod kaayo og dumadapig ni Tommy, apan karon mora’g tua na’s kaatbang makapusta.

* * *

Unsa ni nga balita? Gikiha ang regional direktor sa Bureau of Fire Protection (BFP) nga si Koronel Ma. Luisa Hadjula didto sa Department of Interior and Local Government (DILG) ingon man sa Civil Service Commission?

Ang rason nga gikiha si Hadjula mao nga gibalhin niya didto sa Sogod Fire Station ang usa ka nurse nga si Marrisa Cariño unya gitudlo na lang nga drayber sa firetruck.

Nakapanglingo-lingo ko nga nagbasa sa reklamo ni Cariño kay mora’g wala pa g’yud ko makakita og babaye nga drayber og firetruck kay bug-at baya kaayo ang manobela aning mga trak sa bombero.

Matud ni Hadjula nga gibalhin niya si Cariño didto sa Sogod kay dili maayo sa trabaho diha sa Regional Fire Marshall’s office. Buyno, huwaton nato kun unsay sangpotan sa kaso.