Jejomar vs. Mar

Naapiki na man hinoon si Chief Justice Renato Corona niining nagpadayon niyang impeachment trial. Inay nga makatabang kaniya kining mga testigos nga gipresentar sa depensa nakahatag na man hinoon kini og mga pagduda.

Ang mga giingong nakapalit ug rehistradong tag-iya sa mga kayutaan nga gidudahang gipanag-iya ni Corona daw dili katuhuan. Si kanhi Manila Mayor Lito Atienza nga buot untang motabang sa depensa may tulubagon na hinoon sa Commission on Audit (COA).

Napun-an pa ang listahan sa iyang mga kabtangan sa chief justice sa usa ka balay didto sa Estados Unidos. Gipakatap usab sa internet nga wala gayud diay honors si Corona sa dihang nag-eskuwela pa kini gikan sa elementary hangtud college sukwahi sa iyang gipanghambog.

Sumala pa nga "The truth will set you free." Nagsulti ba sa tinood si CJ Corona?

* * *

Gipaabot nga magsakbang na usab sila si Jejomar Binay ug Mar Roxas niining eleksiyon sa 2016 pagka-presidente sa nasud. Kahinumduman nga nagtigi sila niadtong 2010 sa pagka-bise presidente diin naparot si Roxas.

Daghang nahibulong niadto kay si Binay, nga mayor sa Makati, wala may national exposure itandi kang Roxas nga nakasilbi na isip cabinet member panahon pa ni Pres. Erap Estrada ug ni Pres. Gloria Arroyo sa wala pa siya mapiling senador.

Karon si Bise Presidente Binay nakakuha og labing taas nga approval ug trust rating kay sa tanang mga opisyal sa gobiyerno. Si Roxas wa gyud igdungog sa survey gani gilupig siya nila ni Sen. Loren Legarda ug Sen. Chiz Escudero sa survey sa mga senatoriables.

Kun dili usbon ni Mar ang iyang estilo pagdumala sa iyang pwesto sa gobiyerno ug sa Liberal Party maayo pang dili siya magpatugatuga kay bisan unsaon pag-alsa kaniya ni Kong. Tomas ilubong gayud siya'g taga-liog ni Jejomar.

* * *

Nahitabo na gayud ang panaghiusa sa mga partido ug personalidad nga kaatbang ni Kong. Tomas. Magpaluyo na kang Mayor Mike sila si kanhi Mayor Alvin Garcia, Bgy. Kapitan Jerry Guardo, mga Bgy. Konsehal Mary Ann delos Santos ug Joel Garganera, kanhi Bgy. Kapitan Emoc Rupinta ug daghang mga barangay kapitan. Dili ba mao man kini ang gikahadlokan ni Kong. Tomas?

* * *

Nanobra na man lagi kining mga buot mokandidato sa pagka-konsehal sa reformist group ni Mayor Mike Rama? Sumala pa gud ni Kong. Tomas nga maglisud kuno sa Mayor Mike sa pagpangita og mga kandidato sa iyang grupo.

Sa pagkakaron, ang kandidato na lang sa pagka-kongresista sa north district ang ilang gipilian. Ang posibleng moatbang sa mga del Mar mao sila si kanhi konsehal ug CITOM Chairman Jack Jakosalem, Dr. Potenciano "Yong" Larrazabal 111 ug Lahug Bgy. Konsehal Mary Ann delos Santos.

Si Jakosalem kanunay nga mogulang numero unong konsehal; si Larrazabal gikan sa usa ka inilang political family sa Ormoc, Leyte; ug si delos Santos mao ang lider nga gituhuan nga maoy hinungdan nga wala gayud makadaug si Osmeña sa Lahug.

* * *

Email: [email protected]