Dili makiangayon ang silot

Wala tugoti sa mga madre sa St. Theresas College nga makapaso (bisan og nakapasar) ang lima ka mga tinun-an niini sa high school tungod kay ilang nakit-an sa facebook nga nagbikini, nagkupot og sigarilyo ug ilimnong makahubog. Matud pa sa mga opisyal nga madre sa nahisgutang tunghaan nga nakalapas sa palisiya sa tunghaan ang lima ka mga tinun-an tungod sa ilang gihimo. Sa lima ka mga tinun-an, ang duha lang ang nagreklamo. Ang reklamo sa duha gipaabot gayod sa ilang mga ginikanan sa hukmanan human wala patalinghogi sa mga madre ang ilang hangyo nga usbon ang nauna niining hukom.

Sa ilang reklamo gipasabot sa mga tinun-an nga wala sila hatagi og higayon sa mga madre nga makapasabot sa ilang nakita sa facebook. Ang mga tinun-an mipasabot nga ang nakita sa mga madre nahitabo atol sa usa ka family rejoicing ug ang ilang gibitbit dili sigarilyo ni ilimnong makahubog.

Samtang angayan gayod nga sundon sa mga tinun-an ang mga palisiya sa tunghaan kay kun dili, sila masilotan, pero gikinahanglan usab nga sundon sa mga opisyal sa tunghaan ang gitawag nga due process. Samtang adunay gahom ang mga opisyal nga madre sa secondary education sa St. Theresas College sa pagdisiplina sa ilang mga tinun-an nga nakalapas sa mga patakaran sa ilang tunghaan apan wala kini magpasabot nga manglaktod na lang upod sila sa ilang pagpakanaug og hukom. Gikinahanglan pa sila nga maminaw sa habig sa mga tinun-an nga ilang hikawan sa pribilihiyo ug katungod nga gihatag sa tunghaan ug sa batakang balaud.

Ang mga madre adunay rason sa ilang gihimo, nanglaktod lang sila. Wala sila moobserbar og due process of law sa dihang ilang gipahamtangan og silot ang mga tinun-an nga dili makaapil sa graduation ceremony bisan og sila nakapasar. Wala nila hatagi og kahigayonan ang mga tinun-an nga makapasabot sa ilang habig. Kun ang atong labaw nga makagagahom miobserbar og due process of law sa dihang nakasala si Adan ug si Eba didto sa paraiso, ang ato pa kahang mga madre ang dili makahimo niini? Nakalimot ba kaha ang mga madre sa St. Theresas College nga sa dihang nakasala ang una natong mga ginikanan nga sila si Adan ug si Eba, wala dayon sila siloti sa atong Ginoo? Ang atong Ginoo nangutana una sa duha diha sa iyang atubangan kun nganong gikaon nila ang iyang gidili, nga sa ato pa, gustong paminawon sa Ginoo ang ilang rason sa wala pa niya sila siloti. Mga sisters sa sunod ayaw na unya ninyo kalimti ang due process. Tungod sa inyong pagpanglaktod nahimong dili makiangayon ang silot nga inyong gipakanaug.