Ang bagang duot sa katawhan sa palibot sa merkado publiko sa Danao City way paghubas adlaw ug sa gabii.
Kini tungod kay ang dagway ni Kristo miklaro na kuno kaayo lahi sa unang adlaw nga hanap-hanap og dyutay nga nagpilit sa pader nga semento sa merkado publiko sa maong siyudad.
Usa sa labing kusog nga negosyo sa maong lugar karon mao ang kandila nga gipanarok sa mananagkot sa palibot sa pader diin nahulma ang dagway ni Kristo.
Ang ubang negosyo nga kusog kaayo mao ang barbecue, puso, ug uban matang sa pagkaon, mga buwak ug uban pa.
Gani gituohan nila nga pinaagi sa pag-ampo nila nga magkauli ang maayong kabubut-on sa managsuong Durano nga nagkabingkil karon, matuman gayud.
Dinhi sila nakatuo nga gamhanan kaayo ang dagway ni Kristo bisan kun nagpilit lang kini sa pader.
Hinuon nagpaila lang kini nga daghan na kaayong maayong laki nga painter karong panahona nga labaw pa kang Leonardo da Vinci nga maoy unang mikulit sa dagway ni Kristo pinaagi sa pagkopya sa dagway sa usa ka tawo kinsa sa kaulahian mao ra usab ang gikopyahan niya sa dagway ni Hudas.
Apan yuna pa, sukad si Kristo mikayab sa langit, wa nay tawo nga nakadungog sa iyang personal nga tingog ug pulong gikan sa iyang baba, lahi niadtong dinhi pa siya sa yuta nga nakigsulti sa katawhan ug yano kaayo nimong mahikap ug makita kay tawo man.
Karong tua na Siya sa langit, ang bugtong mabasa sa katawhan nga pulong ni Kristo mao ra ang nahasulat sa Biblia nga napatik pila ka tuig human siya mosaka sa langit .
Apan sa Biblia wala’y gisugo si Kristo nga ipasimba ang Iyang larawan gikan niadtong buhi pa siya dinhi sa yuta ug hangtod karon nga tua na siya sa langit.
Hinuon ang bugtong mabasa sa Biblia mao nga simbahon ang Dios ug si Kristo pinaagi sa espiritu ug kamatuoran tungod kay wala sila’y tinuod nga larawan. Di ba?