Last will and testament

Ang Last Will and Testament maoy sagad himoon sa mga ginikanan o si bisan kinsa nga adunay mga kabtangan nga ibilin sa ilang mga anak o kaliwat aron di mag-ilog o mag-away ang kabanay nga nahibilin kon sila mangamatay na. Busa ang atong tukion karon mao kining pangutana labot sa Last Will and Testament.

Maayong adlaw Atty. Divine,

Ako si Mrs. Rhea taga Sibonga, Cebu, mangutana lang ko regarding aning last will sa akong maguwang. Namatay na siya niadtong Hulyo 30, 2011. Ang nakasulat sa iyang last will nga gibilin niya ning balay ug yuta dire sa Sibonga ug ang laing yuta niya sa Sabang namong duha sa akong anak kay kami man ang nag-atiman niya sa iyang pagsakit hangtud nga siya namatay. Wa siyay anak apan aduna siyay adopted. Ang akong pangutana atty. kay ang petsa sa iyang last will inay July 25, 2011 ang nasuwat niya sa last will August 25, 2011 ug anang petsaha namatay na man siya busa ang akong pangutana attorney kun balido ba ning maong last will, naa man iya pirma. Thank you and GOD bless. — Mrs. Rhea”

* * *

Mrs Rhea,

Salamat sa imong pagsuwat sa Legal Corner. Kun ang gihimo sa imong igsuon Holographic Will buot ipasabot nga iyang sinuwat sa kamot ang tibuok niyang Last Will, importante gyud ang petsa niini ug ang iya mismong pirma basi sa Article 810 sa Civil Code, wa na kini magkinahanglan og notaryo ug way mga testigo kun kini Holographic Will. Apan ang maong Last Will dili automatic nga mapatuman kay kinahanglan pa kining isumiter sa Korte alang sa probate pagsuta kun natuman ba ang tanang rekisitos sa balaod alang sa paghimo og Holographic Will. Hinuon adunay mga higayon nga ang korte mokonsiderar sa depekto sa Last Will basta aduna lay substantial compliance sa rekisitos basi sa Article 809 sa Civil Code.

Ang maayo ninyong buhaton karon mao ang pagpaprobate sa maong Last Will sa imong igsuon aron ang Korte na ang modesisyon niini kun balido o dili tungod sa sayop nga petsa ilabi na kay aduna siyay adopted nga anak nga basi sa balaod aduna say katungod nga makasunod sa kabtangan sa mi adopt kaniya. Salamat. — Atty. Divine

Gawas sa Holographic Will ang laing paagi sa paghimo og Last Will and Testament mao kanang notarized gyud ug adunay tulo ka testigo basi sa Art. 805 sa Civil Code. Kun magpahimo mo og Last Will mas maayo nga mokonsulta mo og abogado aron kamo magiyahan kun unsaon sa pagbahin ang imong mga kabtangan ilabi na kun ikaw adunay mga anak nga matawag og mga compulsory heirs nga dili mamahimong hikawan sa iyang bahin gawas lang kun adunay balidong rason nga siya i-disinherit.

LEGAL CORNER Atty. Divine Marcial-Flores, c/o Banat News, corner D. Jakosalem and V. Gullas Sts., Brgy. Sto. Nino, 6000 Cebu City or email sa [email protected]