TOYM awardees vs mga abogado

Human sa paukyab sa kampo ni Cebu City Mayor Michael Rama mahitungod sa pagtapo ni Konsehal Edgardo Labella, wala usab magpabintaha ang kampo ni south district Representative Tomas Osmeña.

Sa niaging semana, kugi si Osmeña ug ang iyang local political party, ang Bando Osmeña Pundok Kauswagan, pag-advertise sa mga lokal nga pamantalaan mahitungod sa ilang tandem ni Bise Mayor Joy Augustus Young sa eleksiyon sa sunod tuig.

Ilalum sa titulong Buy One Take One, gipanghambog sa maong advertisement nga ang tandem nilang kongresista ug bise mayor maoy labing una sa kasaysayan sa Pilipinas: pulos mga awardee sa Ten Outstanding Young Men o TOYM.

Si Osmeña nahimong TOYM awardee kaniadtong 1989 samtang si Young niadtong 1994. Sila gipasidunggan gumikan sa ilang talagsaong kalampusan sa natad sa serbisyo publiko.

Apan dili maayo ang reaksiyon sa publiko. Lain kuno og tonada ang titulo sa maong advertisement. Rason sa pipila nga kun mga palaliton silang Osmeña ug Young, klarong pakapin lamang ang bise mayor.

Hinuon miani og dakong publisidad ang maong advertisement gumikan lagi sa grabe’ng atensiyon nga nakuha niini gikan sa mga Sugboanon. Adunay mga nangyam-id tungod kay sayo kuno kini nga paagi sa kampanya sa BOPK, adunay mga nalipay usab tungod kay sinyales kuno kini nga molansar gayud si Osmeña pagka-mayor sa sunod piniliay.

Hinuon walay nalapas ang BOPK sa balaud, ilabina sa lagda sa Commission on Elections mahitungod sa early campaigning. Wala kini miagni sa publiko pagbotar nilang Osmeña ug Young.

Apan bisan pa man niini, dili malikayan sa publiko nga maghuna-huna nga usa kini ka kompanya sa BOPK. Klarong nagkutaw kini sa panghuna-huna sa publiko sa pagtuo nga andam nang tanan alang sa kandidatura nilang Osmeña ug Young pagka-mayor ug bise mayor. 

Ato lamang hulaton kun unsa na usab ang paukyab sa kampo ni Mayor Rama pag-atbang sa “Buy One Take One” sa BOPK. Sa akong tan-aw, alegre gayud unya ang binayloay og mga pasiatab sa duha ka habig.

Kun adunay mga TOYM awardees ang BOPK, makapanghambog usab ang kampo ni Rama nga ang iyang tandem ni Labella mas labaw’ng maayo kay pulos sila mga abogado.

Apan ang desisyon adto unya masuta sa iphanay na sa mga balota.

* * *

Email: [email protected]