Nakatay-og ang ads sa BOPK

Mikalma na si Senador Miriam Defensor-Santiago ning pagbukas sa ikaduhang hugna sa impeachment trial ni Supreme Court chief justice Renato Corona.

Nadutlan si Santiago sa “protesta” ni Atty. Vitaliano Aguirre niadtong nag-inangat pa ang pagtak-op sa presentasyon sa mga ebidensiya sa prosekusyon, pinaagi sa pagsap-ong sa iyang dunggan samtang ang senadora nangasaba sa kampo sa prosekusyon tungod sa pagpahibalo nila sa pag-withdraw sa lima ka articles of impeachment.

Kun nahimo niya karon nga kalmado kun mobarog ug mosalga sa hearing nga ang kampo sa depensa na ang nagbarog sa impeachment court, nganong wala man kini mahimo sa panahon sa kampo sa prosekusyon?

Nagpasabot ba kini nga tua siya makapusta kang Corona?

Mga pangutana lamang hinuon kini nga matubag kun himuon na ang botasyon kun konbiktohon ba o dili si Corona sa impeachment court.

* * *

Natay-og ang Team Rama sa gipagawas nga advertisement sa Bando Osmeña Pundok Kauswagan (BOPK) nga “Buy One Take One.” Sa maong advertisement sa The Freeman niadtong miaging adlaw, gipanghambog ni Mayor Tomas Osmeña ug Bise Mayor Joy Augustus Young ang ilang mga achievements isip mga awardees sa Ten Outstanding Young Men (TOYM).

Dali kaayong naka-react ang mga Rama sa maong advertisement. Si Konsehal Joey Daluz naka-react usab nga early electioneering ang maong advertisement, bisan ang balaod nag-ingon nga ang kandidato malambigit og early campaigning kun nakasang-at na kini og certificate of candidacy (COC) ug nangampanya bisan wala pa ang campaign period.

Ang maayo tingaleng buhaton sa Team Rama mao ang pagpakusog pa sa ilang kampo ug pasagdan ang BOPK nga mohimo sa ilang mga gimik. Dili na maliso nga ang Team Rama nagkakusog karon sa dihang mitumaw ang mga personalidad nga buot mokuyog sa kampo ni Mayor Mike Rama sa 2013 nga eleksiyon.

Kun madayon, kining tandem nilang Mike ug Konsehal Edgardo Labella isip iyang bise mayor, kusog-kusog kini nga angay usab kahadlokan sa BOPK.

Si Tomas na-testingan na sa mga Sugboanon. Apan kanang pagka-testinga, kuyog si Mike nga iyang bise mayor sulod sa dugay na’ng katuigan. Sa ato pa, unsay resulta niining 2013 nga eleksiyon, magsulti kun kang kinsang liderato ang ilang na-uyonan – kang Tomas ba o kang Mike. Ang panagsakbang nilang Young ug Labella maoy kulba-hinam sa 2013 nga eleksiyon. Si Young usa ka achiever isip awardee sa TOYM ug nagserbisyo usab kini sa Cebu City Hall sulod sa dugay-dugay na nga panahon. Bisan niadtong mga higayon nga wala siya magpapili, nagserbisyo siya isip consultant sa education program sa siyudad.

Sa laing bahin, nakaila kita kang Labella isip kanhi director sa Ombudsman Visayas. Gawas sa iyang kaligdong isip public servant, kugihan usab kini sa iyang pagka-konsehal ug walay mga isyu nga giatubang. Tan-awon nato sa 2013 kun motuo ba ang mga tawo sa pasangil nga si Young maoy dako nga “obstructionist” sa siyudad kay siya man ang mangulo sa mga konsehal nga kusog mobabag sa mga programa ni Mike pinaagi sa pagpugong o pagtuli sa pundo.

Balik sa advertisement, makapaabot kaha kita og bawos nga advertisement sa Team Rama?

Sa akong nakita, adunay mga “pabuto” nga mga advertisement ang Team Rama. Kun mao kini, sayo nga makatimbang-timbang ang mga Sugboanon kinsay ilang suportahan sa sunod tuig nga eleksiyon.