Nabintahaan ang ordinaryo nga mamumuo

Mangayo na usab og usbaw sa ilang suweldo ang mga mamumuo tungod kay ang mga drayber ug operator sa pangpublikong sakyanan sama sa taxi ug PUJ mangayo na man usab og usbaw sa minimum nga plitehan.

Ang pagpangayo og usbaw sa minimum nga plitehan sa mga drayber tungod usab sa nagpadayon nga pagsaka sa presyo sa matag litro sa produktong petrolyo sama sa krudo, gasoline ug uban pa.

Nunot usab sa pag-usbaw sa presyo sa produktong petrolyo ang mga drayber ug operator sa mga publikong sakyanan tataw kaayo nga mangayo usab og usbaw sa minimum nga plitehan.

Gumikan niini ang mga sumasakay nga mga ordinaryo lamang nga trabahante nga maoy maapektohan sa maong kahimtang mangayo usab og usbaw sa ilang suweldo kay makatarunganon man kay dako na man usab matag adlaw nilang galastohan.

Daghan ang nag-ingon nga kun buot hunahunaon kanunay nga nabintahaan ang mga ordinaryong mamumuo tungod kay dili man madali ang ilang pagpangayo og usbaw sa suweldo kay ang mga kompaniya nga ilang gitrabahoan lakip man usab sa naapektohan sa pag-usbaw sa presyo sa produktong petrolyo.

Samtang ang mga drayber ug operator dili man lisod alang kanila ang pagpangayo og usbaw kay ang ahensiya nga moluwat og kamandoan sa pagpausbaw sa plitehan dili man maapektohan.

Matud pa nila nga ang mga mamumuo daan na nga nabintahaan kay ang kagamhanan may programa man tuod nga Pantawid Pamilya program apan alang lamang kini sa mga kabus nga mopasar usab sa mga sumbanan nga gipatuman sa Department of Social Services and Development kon DSWD. 

Ug susamang programa usab ang naangkon sa mga drayber nga gitawag og Pantawid Pasada program nga pinaagi niini ilang madawat ang pinansiyal nga tabang gikan sa kagamhanan. (Romeo T. Limpangog)