Supalpal

Human masupalpal sa laing higayon ang prosecution panel sa nagpadayong impeachment trial batok ni Chief Justice Renato Corona, nahukman sa prosecution nga biyaan nalang ang duha ka mga pasangil nila ubos sa Article 3 sa impeachment complaint.

Gipahibawo ni House prosecutor Giorgidi Aggabao ang ilang hukom sa miaging adlaw human sila napakyas pagpresentar sa vice president for sales sa Philippine Airlines nga si Enrique Javier. Tumong unta sa ilang pagpresentar ni Javier mao ang pagmatuod nga si Corona ug ang iyang asawa naghupot og platinum card diin libre sila sa plete sa mga eroplano sa PAL.

Buot ipakita sa prosecution nga ang hinungdan sa pagpabor sa Korte Suprema sa PAL sa kaso nga gisang-at sa mga sakop sa Flight Attendants and Stewards Association of the Philippines tungod ni sa pabor nga gidawat ni Corona gikan sa airline company. Apan wala itugot ni Senate President Juan Ponce Enrile kinsa maoy presiding officer sa impeachment court tungod sa rason nga irrelevant ug immaterial ang iyang testimony sa unod sa article 3. Matud ni Enrile nga wala malakip sa pasangil ubos sa article 3 ang bribery diin maoy tumong sa testimony ni Javier.

Nunot niini nakahukom ang prosecution nga dili nalang sila modayon og presenter og mga ebidensiya sa ilang pasangil nga si Corona mipabor ngadto ni kanhi presidente Gloria Macapagal Arroyo ug ingon man sa laing pasangil nga siya nakigmiting kang Lauro Vizconde ug mihatag og mga kasayuran nga confidential maylabot sa deliberasyon sa kaso nga naglambigit sa Vizconde massacre.

Ambot unsay hinungdan sa pag-abandonar sa prosecution niining duha ka pasangil nga unta wa man kini’y labot sa pamahayag ni Javier? Apan dunay mga pagduda nga gituyo ni sa prosecution agi og protesta sa kahigpit sa senado sa technicality.

Kun dili pa sa bahad sa mga senador nga ilang i-cite for contempt ang si bisan kinsa nga mohimo og mga lakang nga makabalda sa trial posibling ni-walkout na ang mga sakop sa prosecution sama sa gihimo niadto sa mga prosecutors panahon sa impeachment trial ni kanhi presidente Joseph Estrada dihang wala tugoti nga ablihan ang envelop nga giingong ebidensiya sa money laundering activity ni Estrada.

Gapunay og tiyabaw ang prosecution nga labihan ka istrikto sa senado sa technicality. Ilang gisubli-subli nga angayang liberal ang mga senador sa pagdawat og mga ebidensiya aron mogawas ang kamatuoran niining pasangil batok ni Corona.

Apan ang dakong pangutana, hangtud asa ba kutob ang liberality sa senado? Mamahimo bang isakripisyo ang katungod ni Corona nga hatagan og due process tungod lang sa liberality nga gipangayo sa prosecution?

Nganong ang senado man maoy hangyoon sa prosecution nga moyukbo ug mosunod sa ilang kapritso? Dili ba angayan nga, isip mga magbabalaod, sila mosubay sa hustong paagi paghusay sa kaso? Nganong ang mga senador man maoy pakasad-on og dili nila mapresentar ang ilang mga testigo tungod kay wala nila malakip sa ilang reklamo?

Kun gusto diay nilang mopresentar og ebidensiya pagprobar nga si Corona midawat og suborno gikan sa PAL nganong wala man nila klaroha daan sa ilang reklamo? Sama nga kun gusto diay nilang mopresentar og ebidensiya nga dunay ill-gotten wealth si Corona nganong wala man nila klaroha daan sa ilang articles of impeachment?

Kun ang mga kongresista nagdanghag sa ilang trabaho tungod kay gidali-dali gyud ang pagpasaka sa kaso ila diay’ng basolon ang mga senador nga igo lang misunod sa gilatid sa balaud sa ilang palpak? Kalisud og maoy magdaghan.

* * *

[email protected]