Miyerkules na usab sa Badlis

Pebrero 22, 2012 mao ang sinugdanan sa panahon sa kuwaresma. Tiniman-an kini ginamit ang abo nga ibadlis sa mga agtang sa mga tawo nga manimba. Ang mahinungdanong simbolo niini mao man ang abo gikan sa sinunog nga mga lukay sa niaging Domingo sa Lukay. Bug-at kaayo og implikasyon ang abo diha sa atong kinabuhi.

Kini nagpasabot nga ang abo nipahinumdom kanato sa atong kaubos ug kakabos. Sa abo kita gikan ug sa abo kita pauli. Kay kini man ang atong sinugdanan ingon man ang katapusan, makatarunganon lamang nga dili kita magpasiatab sa atong kaugalingong kaantigohan o nakab-ot nga tingusbawan.

Ang tanan biyaan lamang ug kita mobalik sa atong pagkaabog. Mao nga dunay maayo ug hamtong nga resulta usab ang pagkamapaubsanon. Ang panahon sa kuwaresma nagdapit kanato sa paghinumdom kun unsa diay ka mahinungdanon ang pagpaubos.

Kay diha lamang sa pagpaubos ang tawo makasinati kun unsa diay ka maayo ang pasaylo alang kaniya. Kay wala’y pasaylo nga mahimo kun ang tawo dili maantigong moangkon sa iyang kakulangan ug bugtong mapaubsanon lamang ang mobuhat sa ingon.