Samtang nagpadayon ang impeachment trial ni Chief Justice Renato Corona nagpadayon usab ang panag-away sa mga pulong nila ni Chief Justice Corona ug Pangulong Noynoy Aquino. Ning ulahi gihagit ni Pangulong Aquino si Chief Justice Corona sa pagpagawas sa iyang mga bank account apan gibawsan siya sa punong mahistrado sa paghagit sa pagpagawas usab sa iyang SALN ug ipaapil pa sa punong mahistrado ang psychological record sa presidente.
Sa kadugayang tubag nila ni Corona ug Aquino natakdan na ang punong mahistrado sa pagka politiko ni Pangulong Aquino. Mikanaug na siya sa iyang level si Chief Justice Renato Corona. Politiko na ang iyang tinubagan sa mga ataki ni Presidente Noynoy Aquino. Nanaut na og tawo ang Chief Justice butang nga dili angayang himoon sa labing taas nga mahistrado sa nasud tungod kay mahistrado siya, dili siya politiko. Walay bali kun ang presidente manaot sa Chief Justice tungod kay politiko man kini, kay mao man kini ang kultura sa politiko.
Kun si kinsa man ang nagtambag sa mahistrado nga motira na og below the belt ngadto kang Pangulong Aquino kinahanglan nga mangayo og pasaylo sa mahistrado tungod kay wala makatabang sa mahistrado ang iyang tambag hinoon nakapaubos kini sa pagkatawo sa punong mahistrado.
Sa atong nakita gidala na sa duha ka dagkong opisyal sa duha ka sanga sa atong gobyerno ang ilang away sa gawas sa impeachment court, ila na kining gidala sa bar of public opinion. Ang Pangulong Aquino nga dili makaseguro sa Senado nga tan-aw niya dili sama sa mga kongresista nga madiktaran nagsige og pagawas og mga pamahayag nga nagkondisyon sa huna-huna sa katawhan sa posibling hukom sa impeachment court. Mao usab ang gihimo sa punong mahistrado. Busa ang duha akong giawhag sa paghilom ug tugotan na lamang ang Senado o impeachment court nga independente kining makahimo sa ilang trabaho. Mohunong nalang unta sa ilang pagbinata si Pangulong Aquino ug punong mahistrado Corona.