EDITORYAL - Ang kasuko ni Mayor Rama batok polis

Sa panghitabo karon nga hapit kada gabii makapatay og tawo kining mga sakop sa drive-by shooting nga grupo way lider sa komunidad nga di mohiwasa batok sa kapolisan.

Kini tungod kay nakataya ang kinabuhi sa kadaghanan niini nga kun mapasagdan nga di masumpo kining maong matang sa krimen kuyaw na kaayo ang katawhan ilabi na ang mga batan-on nga maglakaw-lakaw sa karsada panahon sa gabii.

Kun ang mga kaparian mikisikisi niadtong trabaho sa gitawag nga vigilantes kansang target mao ang mga notadong kriminal, daw unsa pa kaha kining drive-by shooting nga bisan kinsa lay patyon.

Hinuon giingon nga kasagaran sa gipamatay niining grupoha sud na sa nagsunod-sunod nga mga gabii, mga sakop sa Crips gang, apan peligro kaayo kun ang imong anak nga batan-on nga gikan sa eskuylahan o kaha sa trabaho ug maalaan lang miyembro sa Crips, aw way duha-duha nga ihawon niining mga tawhana.   

Magsakay man kuno og gray nga awto kining grupoha apan way plate number, busa may giya ang kapolisan, apan ang dakong kuyaw niini kun mogamit na kini og nagkalainlaing sakyanan mosamot ang kalisud sulbaron niining maong problema.

Ambot kaha basin wa hatagi og hustong budget ang mga sakop sa intelligence group ning siyudad mao tingale hinungdan nga motapol sila sa pagpaniid niining drive-by shooting nga grupo.

Ang nalagotan ni Mayor Rama kay wa man unta magkuwang ang kagamhanan sa paghatag og suporta sa kapolisan, sama sa kaping 40 ka mga motorsiklo nga iyang gipagamit sa mga polis aron mogukod sa mga tulisang de motor, ug mga kriminal nga de motor sama niining tigsakay sa gray nga awto nga way plate number.

Unsa may gigamitan niining mga motora, di kaha para service lang sa mga polis sa ilang pag-report sa trabaho, unya kutob ra diha, hayahaya gud.

Mao na nga nauso ang pagya nga "hayahay pa sa polis" , ug natural lang nga masuko ang mayor basin nagmika lang ang mga polis ug wa mangita og solusyon ning maong problema.

Ambot daghan na ba kaha og agi sa pagsulbad og krimen kining mga polis nga maoy tigsakay niining mga motorsiklo nga 44 ka buok. Di ba?