Drug test sa mga drayber

Gihigpitan sa Land Transportation Office (LTO) nga makabaton og lisensiya alang sa pagmaneho og sakyanan kadtong mga naggamit og illegal nga drugas nga maoy hinungdan nga ang si bisan kinsa nga mokuha niini mopaubos gayod sa drug test.

Ang mga nagtinguha sa pagbaton sa maong lisensiya sa pagmaneho og sakyanan nga masuta nga positibo sa drug test dili gayod makabaton niini sanglit matataw man nga naggamit kini og illegal nga drugas. Sa panahon nga mo-expire na ang maong lisensiya dili usab kahatagan og bag-o kun dili usab kini makapaubos og drug test sa pagsiguro gihapon nga dili drug adik ang mga drayber nga makabaton sa maong mahinungdanong dokumento alang sa pagmaneho og sakyanan. Bisan sa maong paagi sa pagkuha og lisensiya sa pagmaneho og sakyanan sa gihapon dili gayod kalikayan nga adunay mga drug addict nga makabaton og lisensiya ug padayon nga nagmaneho og sakyanan.

Gumikan niini gihimo na usab sa LTO ang roadside random drug test sa mga drayber nga nagmaneho og sakyanan sa pag-ila niadtong mga drayber nga nalambigit sa paggamit sa illegal nga drugas.

Ang pagpaubos og drug test alang sa pagkuha og lisensiya adunay mga reklamo nga mitumaw gikan sa mga drayber ug usa sa ilang reklamo mao ang dugang nilang balayranan niini.

Sa random drug test nga gihimo sa LTO sa gihapon adunay gipadayag nga reklamo ang mga drayber sanglit dili lang makalangan sa ilang pagbiyahe makahasol pa gayod kanila.

Gipaluyohan hinuon kini sa kinabag-ang katawhan ang gihimo sa LTO tungod kay gitumong man kini alang sa kasiguroan sa publiko pinaagi sa pagpakgang sa mga drug addict nga makabaton og lisensiya sa pagmaneho og sakyanan nga giingong maoy nag-unang hinungdan sa aksidente.