EDITORYAL - Ang pagpa-insured og trabahante

Ang mga establisemento sa negosyo gi-obligar sa gobiyerno nga ipasiguro sa SSS ang ilang trabahante .

Kini alang sa kaayohan sa matag kawani pag-abot sa adlaw sa ilang retirement age nga may madawat silang pension. Gawas sa pension may burial benefit pa usab nga ihatag sa SSS ngadto sa matag membro niini nga makabsan sa kinabuhi.

Ang pagpugos sa mga establisemento nga patukoron og Disaster Response Team (DRT)   sama sa gisugyot sa konseho sa dakbayan sa Sugbo, aw maayo man kay alang ra man usab kana sa kaayohan sa kompaniya engkaso kun may   mga kalamidad nga moabot sa maong kompaniya sama sa sunog, baha, bagyo , linog ug uban pa

Apan ang pagpugos kanila nga ipasiguro   ubos sa accident insurance   ang mga kawani nila nga mahisakop sa DRT, aw usa kaayo kini ka salikwaot nga paagi kay masikwati mo sa mga abogado sa mga employer kinsa labing nasayud nga way balaod ang nasud   niini aron basehan sa lokal nga magbabalaod sa ilang pandayonong balaod.

Hinuon   sa mga bright nga   amo sama sa mga kontraktor sa mga dagkong building   diin ang kinabuhi sa iyang trabahante naglatay sa usa ka lugas lanot, aw iya  gyung kuhaan og accident insurance ang iyang mga tawo buwahan kun mamatay kini diha sa trabaho , di maggikan sa iyang bulsa ang ihatag ngadto sa pamilya niini, kundi maggikan sa kompaniya sa insurance.

Apan sa gihapon iyang discretion ang tanan ug way balaod nga nagsugo o kaha nagpugos kaniya sa pagbuhat sa ingon.

Mao kanay gibuhat sa mga tag-iya og sakyanang pasaheroan sama sa bus, barko, eroplano ug uban pa.

Apan bahin sa kantidad kun pila, aw discretion o kabubut-on gihapon sa usa ka amo ang tanan.

Bahin sa bayranan sa premium niini anaa na sa amo kun motabang ba siya sa pagbayad o kaha ipasolo niya sa iyang empleyado pinaagi sa data-data nga paagi. Di   ba?