Ang kahadlok sa tsunami

Nagkaguliyang ang katawhan sa Sugbo tungod sa kahadlok sa tsunami. Ang mga sakyanan sa kadalanan hapit na lang magbinanggaay samtang ang uban kanila nagbinundolay apan ang mga nagmaneho niini wala na lang magreklamo tungod kay parihang nanggidali. Ang mga tawong walay sakyanan kusog nga nanggidagan sa kadalanan sa Sugbo nga walay lingi-lingi aron sa pagpalayo sa ilang giingong tsunami nga nagsunod na kanila. Ang uban kanila naglumbaanay sa pagsaka sa mga flyovers ug mga rooftop sa mga tag-as nga kabalayan ug edipisyo.

Sa Barangay Guadalupe ang mga sakyanan nga hinay managan gibiyaan na lang sa tunga sa dalan sa ilang mga drivers. Hasta ang patay sa Barangay Apas gibiyaan sa mga maghatod unta niini sa iyang lubnganan. Ang pipila ka mga simbahan ug barangay hall napuno sa mga tawo nga nanglalin samtang ang uban kanila nanaka sa bukid. Nianang pagka gabii mingaw na kaayo ang kadalanan tungod kay wala na kaayoy pasahero ug tagsa na lang usab kaayo ang mga sakyanan nga nagdagan. Ingon ani ang talan-awon nga atong nakita niadtong Lunes sa hapon. Ug kining tanan mugna sa wala masabti nga tsunami alert nga gipagawas sa Phivolcs.

Tungod sa atong nakita sa nasud sa Japan sa dihang giigo kini sa tsunami, ingon adto ang nahimong reaction sa mga Sugboanon dihang nakadungog kini og tsunami alert. Bisan og nahimong kataw-anan at least ilang gipakita ang ilang kaabtik sa pagluwas sa ilang kaugalingon.