Tsunami kuno

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini. 

Daw giduyan ang tibuok lalawigan sa Sugbo sa kalit nga pagtay-og sa linog alas 11 pasado ang takna kagahapon sa buntag nga nakapakugang kaayo sa katawhan nga nakapahunong sa makadiyot sa ilang tagsa-tagsa ka mga gimbuhaton.

Gumikan sa kakalit sa maong hitabo ang mga tawo nga diha sa sulod sa mall, mga department store, mga tag-as nga edipisyo daw wala dayon makalihok sanglit ang unang gihimo sa mga tawo mao man ang pagpaniid sa kalit nga pagtay-og sa mga edipisyo nga nahimutangan niini.

Nakalihok lamang sa pagpanggawas sa ilang nahimutangan ang mga tawo dihang nahuman na ang pagtay-og sa kabalaka nga duna pay laing pagtay-og nga mahitabo.

Samtang nagpaingon na sa pagkalma ang mga tawo wala lamang damha nga mitunaw ang usa ka sayop nga mga taho nga adunay tsunami nga umaabot.

Nakaalarma kini sa mga tawo ilabina kadtong diha sa kadalanan nga nag-iyahay na sa pagpanagan paingon sa uptown area sa pagsiguro sa ilang kaugalingon nga atua na mahimutang sa ibabaw nga bahin.

Nag-iyahay sa pagdagan ang mga tawo ug kuyaw na hinuon kaayo nga madasmagan sa mga sakyanan nga ang pipila ka mga drayber wala masayod sa maong hitabo daw gibati na usab og kahadlok sa ilang nakita.

Sa nasayran nga ang Philippine Volcanology and Siesmology (Philvocs) miluwat og tsunami alert level 2 human sa nahitabong pagtay-og sa linog.

Wala hinuon madugay ang mao nilang pagluwat og tsunami alert sanglit gilibkas man usab kini sa paglabay sa pipila ka gutlo.