Human siya maayo

Adunay nindot kaayo nga transition nga atong makita karon sa ebanghelyo. Human maayo sa iyang balatian ang ugangang babaye ni Pedro ang mibarog ug misilbi kanila. Butang nga naghatag kanato og timailhan nga ang matag kaayohan gikinahanglang mobunga gyud og usa ka buhat. Sama kini sa mga personal nga kasinatian sa akong usa ka higala nga human siya ma-diagnosed nga dunay prostate cancer ang nawad-an na sa paglaum. Mao nga nihimo siya og pakig-bargain ngadto sa Dios. Tuod man, gidungog ang iyang hangyo. Naayo siya. Human sa iyang kaayohan, iya pud gituman ang iyang panaad nga mogahin siya og panahon alang sa mga kalihukan sa Simbahan. Dili sama sa uban nga human maayo ang ningbalik man hinuon sa naandan nilang pagpakasala.

Dili ra man pisikal ang sakit sa tawo. Dunay espiritwal ug emosyonal usab. Kitang tanan ang moagi gyud niining maong kasinatian. Apan ang nakasakit kay daghan nato ang mouknol ug gipalabi nato ang atong pagkamasakiton diha sa walay pagbuhat og bisan unsa nga makapahilayo kanato gikan sa bisan unsang matang sa kaulipnan. Mao nga human kita maayo gikan sa makaluluwas nga gahom sa Dios himoon pud unta nato ang atong kinabuhi ingon nga konkretong timaan sa maong kaluwasan. Sama sa ugangan ni Pedro nga mibangon aron moalagad ug mohimaya sa nag-ayo kaniya.