Kun i-fix ang swedlo sa mga driver ang sa operator pud?

Ang kinabuhi sa land transport industry anaa sa mga driver. Mao ni ang hinungdan nga daghan sa mga namatigayon ning maong matang sa negosyo, ilabi na ang mga gagmay’ng operator, nabangkarota, gumikan sa pagka-badlongon sa mga driver.

Mo-loan kag P1M aron ipuhonan ning maong matang sa negosyo. Ang maong kantidad, imong gitugyan ngadto sa mga driver … sila na ang bahala kun unsaon nila nga makabayad ka sa imong giutang. Mao ni ang kinabuhi ning maong matang sa negosyo. Sa miaging adlaw, sa atong pagsuwat ning lindog, mi-text kanako ang manager sa usa ka dakung taxi company nga usa sa ilang mga driver, misibat, gibiyaan ang taxi unit sa parkingan sa usa ka dakung mall … nagbilin og kapin sa P4,000 nga utang.

Sa laing higayon, laing driver, mibiya sa unit sa gas station, wala mo-data, wala motubil , nagbilin usab og utang sa kompaniya. Sa miaging pag-ulan-ulan, misugilon kanato ang mekaniko sa usa ka kompaniya sa taxi nga ang driver sa usa ka unit gipasawom sa baha … dakung kadaot ang nahimo. Kini ug daghan pang matang sa kabuang sa mga driver nga naghatag og dakung labad sa sulo sa mga operator. Karon, buot sa LTFRB nga sweldoan na ang maong mga driver. Hayahaya no? Dili man ma-fixed ang income sa operator, labaw pang dili ma-fixed ang maintenance cost sa mga unit … unsa may mahitabo?

Kun sweldoan na ang mga driver, magbinuotan na kaha sila? Unsaon man pag-check kun nagtinapulan o nagkugi ba sila … kay alang nila, sige man ang sweldo? Kun maabiriya ang mga sakyanan, dili kapamasahero, sige gihapon ang sweldo sa mga driver? Asa man usab kuhaa ang ihatag sa mangutong nga mga istambay … i-deduct ba sa sweldo sa mga driver?

* * *

Sa pipila ka estado sa America, ang mga ginikanan maoy silotan sa pagpabadlong sa estudyante nilang mga anak. Sa Palm Beach, Florida, pananglitan, kun ang usa ka estudyante, below 16 years old, mo-absent og 15 ka adlaw sulod sa tulo ka bulan, ang mga ginikanan sa maong estudyante, maoy silotan, bilanggoon up to two months. Hinoon, matud pa, last resort na ni. Sa ato pa, adunay laing mga paagi nga dili kasilotan ang mga ginikanan.

Sa miaging tuig, sa Baltimore, 12 ka ginikanan ang na-priso gumikan ning maong salaud. Sa California, lima ka ginikanan sa Orange County ang gibilanggo gumikan sa kanunay nga pag-absent sa ilang mga anak gikan sa ilang mga klase.

Mao usab sa Alabama, Texas, ug North Carolina, ang mga huwes ning maong mga estadoha, mipahamtang usab og mga silot sa mga ginikanan gumikan sa mga truant nilang mga anak. 

Hinoon, gi-abusahan kini sa ubang kadagkuan sa tunghaan. Sa Pennsylvania, usa ka inahan gimultahan og $8,000 gumikan sa diha nga duha sa iyang mga anak mihunong na pagtungha. Sobra ra sad. Tiaw moy $8,000. Gikiha ang tunghaan.

Kun i-apply kini dinhi sa atong nasud, kadaghang ginikanan nga ma-priso!