EDITORYAL - Ang pagkasaputon ni Senador Miriam

Sa mga ordinaryong mga tawo nga nagsunod sa dagan sa impeachment trial ni CJ Corona, magtuo sila nga murag nabayran ni Corona si Senador Miriam Santiago.

Kini tungod kay kun mosalida na ang senadora , bisan usa siya ka huwes nga senador sa maong kaso, murag pit-on niya pag-ayo ang prosecution nga maoy makapasaka sa iyang dugo.

Di baya destructive ang pagpataas sa senadora sa iyang tingog uban sa kinasuko nga tuno.

Kundi constructive  o makaayo sa bahin sa prosecution tungod kay isip huwes ug usa ka beteranong abogada, nasayud kaayo siya nga ang giatngan sa mga abogado sa respondente mao ra ang mga lapso sa prosecution aron anha nila ligwati sa mga legal kaayong rason pagbaraw sa kiha batok sa ilang kliyente.

Kun mangisog man ang senadora , kini tungod kay gusto siya nga mahimong perfect ang mga ipresentar   nga mga detalye sa prosecution bahin sa unsa mang lakang sa pagpiit sa respondente aron sa makausa pa maglisud pagkuwestiyon ang mga abogado sa depensa.

Kay kun di estriktohon pag-ayo sa senadora ang sistema, malagmit mokompiyansa ang prosecution nga makapaluag alang sa depensa ang pagbaraw sa ipamahayag nila ilabi na ang bahin ikasuporta nila sa ilang mga premise sa mga butang gituohan nilang makapapiit kang Corona.

 Hinuon kun ma-establisar ang kamatuoran nga may mga nalapas nga balaod si Corona nga maghatag og mansa sa iyang pagkatawo ug pangatungdanan sa goberno ug makapahupas sa pagsalig sa publiko kaniya, di baya makapapas niini ang mga waldas sa mga abogado sa depensa pinaagi sa pag-ingon nga ang iyang SALN ug ITR way labot sa kasong impeachment ni Corona .

Kini tungod kay una sa tanan ang labing mahinungdanon, nganong gipasakaan og impeachment nga kaso ang chief justice , kana tungod kay may nasimhutan ang mga magbabalaod nga kuwestionabli niyang mga buhat diha sa iyang pangatungdanan. Di   ba?