Pagpamalandong alang sa Malangkubong Kaayohan

MGA LAMAS SA KINABUHI

Niadto ako sa St. Pauls SM aron kompletohon na lang gyud ang akong kopya sa pandasal. Gawas pa, agi’g bisita na lang pud sa akong mga higala nga tua didto nagtrabaho. Nakaila sila kanako ug ako nakaila usab kanila. Ako silang gikumosta kun nagamit ba nila ang gift certificate nga gikan sa Anitas. Gihatag kadto sa among Christmas Party. Salamat sa Initiative ni Msgr. Achilles Dakay. Apan usa sa mga makapatandog kaayo mao ang ilang giingon: “Among gi-share ang blessing! nga imo pud nga gipaambit kanamo. Kay dunay namatyan sa among kauban mao nga among gipakyaw ang Anitas!” Salamat kay dunay Anitas Bakeshop nga sa walay pagduha-duha ang mipaambit sa ilang panalangin. Pilo-piloon pa unta ang inyong mga grasya!

Daghan nato ang nahikalimot nga dunay mga butang maayo o nindot nga nahitabo sa atong kinabuhi. Ang hinungdan tungod kay daghan nato ang nakapunting lang sa mga demalas ug mga kapakyasan. Nahikalimot ta nga kita mismo panalangin diay alang sa uban! Ang malambigitong pagbinayloay sa mga panalangin maoy paagi sa paghatag og bulok ug kahulogan sa atong kinabuhi. Tinuod, yano ra man ang maong pagpaambit sa gift certificate apan daghan ang nakakaon sa pan gikan sa Anitas. Ug dili kay nakakaon lang, kun dili nga pinaagi sa maong hatag, nahimong usa ka buhing kamatuoran nga dili diay dakong imposible ang pagkamanggihatagon. Busa hunahunaa kanunay ang imong mga panalangin ug dili ang imong mga kapakyasan.