Seguridad sa Sinulog

Sunod-sunod ang pahimangno nga gipagawas sa Dept. of Health alang sa panlawas sa mga tawo nga mosayaw, mosuroy ug motan-aw sa Sinulog. Una, dili maayong magpakawa’ sa pagbitbit og tubig. Ang grabeng kainit nga masinati, posibleng mosangpot sa dehydration o kakuwangan sa tubig sa lawas. Pahimangno sa ahensya, dili maayong magpataka sa pagkaon tungod kay posibleng mosangpot ni sa diarrhea o kalibanga tungod kay dili ka makasiguro sa kalimpyo sa mga pagkaon nga itinda. Kung mahimo, magbutang og sunblock matod sa DOH aron nga dili masunog ang panit sa gipanlantaw nga init nga panahon. Kung seguridad sa panlawas ang hisgutan, nahibawo nang daan ang mga tawo unsa ang mga lakang nga himuon.

Apan kumusta ba ang seguridad sa palibot atol sa giisip nga usa sa labing dakong piyesta sa nasud? Sa kaulohan, nahimong dakong konsiderasyon ang seguridad atol sa piyesta sa Nazareno human makadawat og taho ang Malacanang nga adunay hulga sa terorismo atol sa maong kalihukan. Makapabalaka tungod kay niabot sa walo ka milyon ka mga tawo ang nidugok sa maong piyesta. Apan kung triple ang seguridad sa kaulohan, mao ba ‘sab kaha ni ang seguridad nga ipatuman sa Sugbo nga magsaulog sa Sinulog?

Kung andam na ang tanan alang sa ilang pagkiay karong Domingo, andam na ang tanan sa mga kalihukan nga ilang himuon gikan sa pagsimba hangtud na sa pagtan-aw sa mga kalihukan, andam na ‘sab kaha ang tanan sa mga lakang nga himuon aron masiguro nga luwas silang mosaksi o mamahimong kabahin sa labing dakong piyesta sa Sugbo? 

Matod sa mga pulis, moabot sa dies mil ka mga sakop sa kapulisan, military, mga tinun-an ug mga volunteer ang mohatag sa ilang serbisyo aron masiguro lang nga hapsay ang tibuok kalihukan. 

Ang hulga nga nadawat sa kaulohan usa ka lanog nga mensahe unsay himuon nato dinhi sa Sugbo samtang nangandam sa labing dakong kasaulogan.

Ang labing mahinungdanon nga di’ lang ang mga gitahasan sa hapsay sa seguridad ang maningkamot nga di’ makalusot ang mga dautang elemento. Apan mas maayo nga mismong tawo nga modagsa sa kadalanan nga kabahin sa rota sa Sinulog ug mga tawo nga modagsa sa Basilica del Sto. Niño mahibawo sa mga lakang nga ilang himuon aron makatabang sa pag-monitor sa mga tawo nga adunay kadudahan nga lihok. 

Kanunay nga hinumduman nga ang 30 ka tuig kapin nga paningkamot aron mamahimong grandyoso ang usa ka kalihukan sama sa Sinulog mahimo lang mabungkag ug maguba sa usa ka malampusong pagpangatake sa mga terorista.

Kini ang napamatud-an didto sa Kalibo, Aklan pipila ka tuig na ang nakalabay. Kung atong mahinumduman, adunay usa ka higayon sa ilang tinuig nga festival nga may tawo nga nag-amok nga nipatay og daghang mga tawo. 

Nikabat pa og pipila ka tuig una nahibalik ang kalagsik sa ilang kalihukan. Hinaot nga di’ ni mahitabo sa usa ka malinawon nga dapit sama sa Sugbo. 

Sa mga miaging tuig, nagpakatap og papel ang kapulisan sa publiko paghatag og ideya unsay buhaton sa panahon nga adunay presensya sa mga terorista. Kung balikon ang maong lakang karon, aduna ni maayo ug dili maayong epekto sa nagpadayong kampanya pagdani sa mga bisita. 

Gawas nga makasalig ang mga turista sa seguridad sa Sugbo, makahadlok ‘sab ni sa uban sa pagsuroy-suroy o pagpadayon ba kaha sa ilang planong pagduaw sa Sugbo. 

Ang hulga sa terorismo didto sa kaulohan nagpahinumdum kanato nga likod sa mga relihiyosong kalihukan, adunay mga ginsakpan si satanas nga wa’y laing gihimo gawas sa pagpaabot og maayong okasyon aron ipatigbabaw ang ilang dautang tinguha. Kung unsay atong mga lakang pagpanalipod, kinahanglan nga himuon na karon.

* * *

Email: [email protected] or [email protected]