Kalaki ni Pe

Unsa may inyong reaksiyon sa lakang ni Konsehal Augustus “Jun” Pe pagbalhin sa iyang residensiya ngadto sa south district aron makadagan pag-usab pagka-konsehal sa sunod eleksiyon?

Siguro daghan kaninyo ang mangyam-id ug moingon nga hinakog sa gahum ang gihuhat ni Konsehal Pe. Ug siguro makapangutana kamo ngano nga dili na lamang gayud siya mopahuway ug mopaabot og tulo ka tuig aron pagkandidato pag-usab.

Si Konsehal Pe nag-representar sa north district sulod na sa walo ka tuig. Tungod lagi kay ikatulo na kini niya ka termino, dili na makadagan siya sa susama nga puwesto base sa gilatid sa balaud.   

Apan sa tinguha nga gusto pa siyang moserbisyo isip miyembro sa konseho sa dakbayan sa Sugbo, adunay nahunahunaan si Konsehal Pe nga wala pa gayud masulayi sa mga napiling opisyal. Gusto siyang magpapili pag-usab apan dili sa north district kondili sa south district.

Ug aron matuman ang iyang tinguha, mibalhin siya’g puyo ngadto sa south district sa pamasin nga makadagan pag-usab sa konseho. Usa na ka tuig nga nagpuyo si Konsehal Pe sa Barangay Guadalupe sa south district gikan sa Barangay Capitol Site sa north district.

Hinuon misaad kaniadto si Konsehal Pe nga mo-resign siya sa iyang katungdanan kun mobalhin na ang iyang pagpuyo ngadto sa south district. Kini aron siguro nga dili siya mosango sa Commissions on Elections inig handos na unya sa iyang kandidatora alang sa sunod piniliay.

Apan nausab ang iyang huna-huna. Matud pa sa konsehal, dili na siya mo-resign sa iyang katungdanan sa konseho sa dakbayan. Ug dili kuno kini paglapas sa lagda sa balaud.

Gikonpirma ni Konsehal Pe nga mismong si Comelec chairman Sixto Brillantes ang miingon nga dili na gikinahanglan ang pag-resign sa usa ka opisyal kun modagan kini sa parehong posisyon apan sa laing lugar. Ug masaligon siyang walay babag sa balaud kun dili gayud siya mo-resign.

Apan lisod ang sitwasyon ni Konsehal Pe. Kini tungod kay wala pay opisyal nga nakasuway sa iyang sitwasyon karon. Niining iyang gibuhat, masulayan na gayud ang balaud.

Ato lamang paaboton kun unsa gayud ang resulta niining iyang kalaki. Dili ko makaingon nga paglapas kini sa balaud tungod kay walay klaro ang balaud mahitungod niini.

    Wala man gud gi-specify sa balaud nga puwede siyang modagan pag-usab sa maong posisyon alang sa parehong konseho, apan sa laing distrito. Ug hangtud nga dili pa makahatag sa desisyon ang korte, padayon nga mobunga og mga debate ang desisyon ni Konsehal Pe.

Apan siguradong moani og mga pagbatikos kining iyang desisyon pagbalhin pagpuyo sa south district aron lamang makadagan pag-usab sa konseho sa sunod nga eleksiyon.

Dili ikalimod nga daghan ang nangyam-id kang Konsehal Pe niining iyang gibuhat. Dili gayud kalikayan nga makaingon ang pipila nga klarong hinakog kini sa gahum.

Hinuon katungod ni Konsehal Pe ang pagbalhin og puyo ngadto sa south district bisan pa man kun tua siya nag-representar sa north district. Apan mao lagi, ang iyang gibuhat nagdala hinuon og maot nga ehemplo.

Dili gayud maka-eskapo ang maong konsehal sa mga batikos gikan sa publiko. Magkapuliki gayud siya og panagang niining iyang kalaki. Apan kun makaapekto ba kini sa iya unya nga kandidatura, ato na lamang abangan.

* * *

Email: [email protected]