Pagkatawo ni Kristo paglaom sa katawhan

Ang tibuok kalibotan angay nga magmaya ug mag-malipayon karong panahona kay natawo na si Hesus. Kun si Hesus wala pa natawo diha sa pasungan sa baka dili unta nato maangkon ang kinabuhi nga dayon.

Puro kangitngit ug kangiob ang ato unta nga makita ug wala kita’y makita nga bidlisiw sa paglaom nga usa niana ka adlaw makig-uban kita ni Kristo diha sa iyang gingharian.

Gumikan sa atong pagkasalbahis ug pagkalampingasan. Angay unta kitang silotan ug kondinahon tungod sa atong linuog nga binuhatan apan halapad ug dili hitupngan ang kalooy nga gibati sa atong langitnon nga amahan kanato.

Mao kana nga bisan dili kita angay sa iyang gugma ug kalooy ania kita nakaangkon og kinabuhi nga dayon tungod sa iyang hamili nga dugo nga maoy naghugas sa tanan tang kasal-anan tungod sa dakong gugma ni Hesus dinhi kanato iyang gihugasan sa iyang dugo ang atong mga kasal-anan. Mao kana nga mahimo kitang lubos puti ug wala na gayo’y bisan gamay nga mantsa sa kahugaw.

Busa angay lang kita magpasalamat gumikan niining dakong grasya nga atong nadawat gikan sa Ginoo.