Enero na usab uban ni Maria

Usa ka hamtong lalaki, mikonsulta sa kura paroko tungod sa iyang dakong problema kabahin sa iyang silingang babaye nga dunay depekto sa pangisip. Ang hamtong niingon sa pari:

Matud pa sa usa ka hamtong: Problema kaayo ko padre kay sa mga tulo ka adlaw ang milabay, nagtuo ning bayhana nga siya si San Pablo mao nga buntag ug gabii, gibasa niya ang tanang sulat ni San Pablo. Sunod adlaw, nagtuo siya nga si San Francisco Javier ug nagwali siya sa wala’y pagkutat. Ug sa sunod pa gyud, nagtuo siya nga siya si Sta. Lucia mao nga nising-al siya taman sa ginhawa. Tabangi intawon ko Padre. Wala na gani koy pahuway. Lisud na kaayo ang pagtagpilaw bisan lang og gamay tungod sa kabanha ning maong babaye.

Gipadala sa pari ang maong babaye ug iya kining gika-estorya sulod sa tulo ka minutos. Milabay ang usa ka semana, mibalik ang maong hamtong nga lalaki nga saya na kaayo og panagway. “Padre, ang maong babaye hilom na man kaayo sulod ning mga semanaha. Unsa may imong gisulti ngadto kaniya?” Ang pari mitubag: “Ako siyang gipatuo nga siya ang Birheng Maria.”

Ang kahilom nagkahulogan og kusog ug gahom. Ang tawong mogahin og mga gutlo sa paghilom, usa ka tawong mapamalandungon. Si Maria mao ang atong sumbanan sa maong hiyas, ug gidasig kita sa pag-awat niini diha sa atong pang-inadlaw’ng pagpuyo taliwala sa kagahob ug kaguliyang nga bunga sa kalibutanong kabalisa. Kini ang gipakita nga taras ni Maria. Nagpakahilom siya kay buot niyang mamalandong. Happy New Year sa tanan. Ang tambag alang kanato nga atong usisahon ang kagahapon ug larawon nato diha sa kahilom ang atong mga damgo.