Kadtong naghilak nga babaye sa Katedral

Usa ka babaye nagluhod ug morag naghilak samtang nag-ampo atubangan sa imahen sa Mahal nga Birhen sa Katedral. Nganong masulob-on man kini.

* * *

Suma pa sa iyang kauban naguol pag-ayo kining maong babaye, kinsa nagpangidaron og mga 30 anyos, tungod sa pagkasunog sa Gaisano Central South mall diha sa dan Colon. Empleyada siya sa maong tindahan.

* * *

Nahibaw-an nga duna siyay duha ka anak nga gipaeskuyla ug duna siya’y masakiton nga inahan. Wa na siya’y amahan. Wa na say bana kay milayas kini biniyaan siya.

* * *

Nakahunahuna ako: Kining maong babaye usa ra -- I’m pretty sure -- sa daghang mga kawani sa nasunog nga shopping mall nga karon magul-anon ug wa nay klarong kaugmaon gumikan sa pagkasunog sa gihisgutang mall.

* * *

Ug segurado ako nga kadaghanan niining mga nawad-an or palangitan-an anha na lamang midangop sa Ginoo. Kay kinsa pa may mas labaw pa sa Labaw’ng Makagagahum kun ang atong gipangita maoy kasulbaran sa atong problema?

* * *

Manghinaut kita nga kahatagan og solusyon ang suliran niining liboan ka mga nawad-a’g panginabuhian gumikan sa dakong disgrasya nga miigo intawon sa ilang gitrabahoan.

* * *

TRIVIA -- Belated Christmas greetings sa atong mga higala diha sa Barili. Ug Happy New Year to everyone. Salamat sa inyong pagsuporta sa Banat News. (with JVJ)