Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Milabay na ang adlaw sa pagsaulog sa Pasko ug ang atong gipaabot mao na usab ang pagsugat sa Bag-ong Tuig 2012 nga sagad sa nagtuo pa sa mga gihimo sa panahon pa sa atong katigulangan mohimo usab sa ilang pagpalihi.
Nagkalainlain ang matang sa ilang pagpalihi sa matag sugat sa tungang gabii sa Bag-ong Tuig nga naglakip na niini ang pagtigom og 12 ka lingin nga mga prutas.
Gumikan sa nahimo na nga kinaiya sa pagpalihi sa lingin nga matang nga mga prutas ang mga manindahay sa aseras, Carbon ug bisan sa dagkong department store mopahimulos usab sa kahigayonan sanglit mousbaw man usab ang presyo niining panahona. Naglakip sa mga prutas nga lingin mousbaw ang presyo mao ang mansanas, buongon, bayabas, kaymito, atis, pungkan ug uban pa.
Ang laing palihi sa pagsugat sa tungang gabii sa pagsugat sa Bag-ong Tuig mao ang pagsul-ob og sapot nga adunay desinyo nga lingin ug ang uban kanila mangabli pa sa tanang pultahan ug bintana alang sa pagpasulod sa ilang panimalay sa unang pagsulod sa tuig.
Daghan ang magpalihi nga magpundo og mga sinsiyo nga sa paghagtik sa tungang gabii maoy ilang uyogon alang sa pagkagay sa tuyo nga makabig sa pagsulod ang suwerte sa sulod sa panimalay ug sa mga nagpuyo niini.
Adunay mohimo og mga pagsabasaba sama sa pagdokdok sa takob sa kaldero, lata ug uban pa sa tuyo nga mogawas sa panimalay ang dautang espirito ug uban pa.
Apan daghan ang nag-ingon nga matinuod man o dili ang pagpahigayon og palihi sa pagsugat sa Bag-ong Tuig ang labing dili gayod angay hikalimtan ang hugot nga pag-ampo sa Labaw nga Makagagahom nga pagaubanan usab og kakugi kay labing siguro gayod nga matinuod ang gipangindahay nga suwerte sa tuig 2012. Happy New Year!