EDITORYAL - Nahinumdom ka ba Kaniya?

Gipangandaman pag-ayo sa tawo ang paghatag og mga gasa   o kaha pagdawat og mga gasa niining panahon sa gitawag nga Pasko. 

Ang tanang dayan-dayan sa balay, sa palibot niini, ug   uban pang  makalipay sa iyang mga mata maoy gibundakan og maayo sa mga hiniposang salapi sa pagtuo nga mao kini ang labing malipayong mga gutlo sa iyang kinabuhi.

Ang kagamhanan usab wa magkuwang sa paggamit sa buhis sa katawhan aron idayan-dayan sa kadalanan, parke, plaza ug tanang dapit publiko sa paglingaw sa   tanang hunahuna sa pagduyog sa diwa sa gitawag nga Pasko. 

Ang wa hisayri sa tawo nga may usa ka nagpaabot kun iya bang mahinumdoman ang kaayohang gidalit niini kaniya.

Nganong kaantigo pa siya mobati og kalipay. Nganong kaantigo pa ang iyang mga mata motan-aw sa makalingaw nga mga talan-awon ning kinabuhia. Nganong ang iyang kalag malipay’ng maminaw sa mga huni ug ang katibuk-ang galamhan mobati pa og kabuhong sa kalipay matag pag-abot sa buwan sa Disyembre nga maoy katapusan sa tuig.

Labaw sa tanan nganong may kinabuhi pa siya nga kaantigo mobati sa kalipay diin man diay kini gikan ug kinsay naghatag niini?

Naa kaha sa iyang hunahuna nga gikan kining tanan sa iyang ginikanan, igsuon, paryente   o kaha gikan sa iyang bahandi?

Wa siya kahinumdom nga   bisan ang labing maayong laki nga doktor ug labing bahandianong tawo sa kalibotan mamatay, tungod kay di siya kaantigo mohatag og gininhawa sa iyang kaugalingon o sa laing tawo aron kini mabuhing normal ug mobati og kalipay sama sa imong gibati ning buwan sa Disyembre?

Kini tungod kay may Dios nga naghatag kanato niini. Ug sa imong kalipay karon nahinumdom ka ba sa pagpasalamat Kaniya? Wa kaha ka mosipyat nga imbis Siya nga di makita maoy imong pasalamatan ug daygon kay Kaniya naggikan ang imong pagka-ikaw, ang Iya na hinuong mga binuhat maoy imong gisimba? Di ba?