Decision making ug decision managing

Si John Maxwell, usa sa mga inilang magsusulat ug lecturer sa leadership ang nihatag kanato og kalainan sa decision making ug decision managing. Alang kaniya, ang decision making ug decision managing duha ka mga managlahing mga butang. Ang paghimo og desisyon sa bisan unsang isyu mao ang gitawag natong decision making samtang ang pagdumala o ang pag-screened ning maong mga desisyon mao ang decision managing. Daghan kanato ang nakahimo tuod og desisyon apan wala’y kaantigohan sa pagdumala niini.

Daghan sa mga desisyon ang basta na lang gipagawas tungod kay lagi desisyon apan sa tinuoray lang ang wala gyud kinahanglana. Ang resulta, gubot nga kinabuhi ug wala’y tinong padulngan.

Pangutan-a ang imong kaugalingon kun ang imong desisyon kinahanglanon ba gayud? Daghang mga relasyon ang naungkag, naguba ug nalas-ay tungod kay gi-terminate man dayon sa wala’y igong kapasikaran. Nahimong dautan na hinuon ang mangutana kun unsay hinungdan sa usa ka las-ay nga tinagdan.

Hukman dayon kini nga las-ay, abnormal, komplikado ug wala na siya malipay. Dili magsapayan kun dunay masakitan. Ang mahinungdanon masunod lang ang kinaugalingon nga gana ug kahayahay. Apan kun buot hunahunaon wala’y relasyon nga hayahay. Anaa man gyud ang kalisud labina kun gugma na ang magsugo nga kinahanglang imong ihiklin ang naandan aron gakson mo ang kasamtangan. Ang desisyon nga imong himuon, mosulti sa matang sa imong pagkatawo. Mao nga sa dili ka pa mohimo niini...Pamalandongi una, ginamit ang imong pangisip ingon man ang imong kasingkasing.