Kuyaw nga sakyanan

Ang mga sakyanan sama sa traysikad ug habal-habal maayo nga sakyan ilabi na diha sa mga aspaltado ug sementado nga dalan.

Bisan pa niini ang maong mga sakyanan dili lang gihapon maayo nga sakyan kay ang Land Transportation Office (LTO) wala man magtugot kanila nga makapamasahero.

Tungod niini, ang mga kinabuhi sa mga tawo nga mopahimulos sa serbisyo sa habal-habal ug traysikad mahimong wala’y bili kun ugaling ang ilang gisakyan madisgrasya sa kadalanan. Maayudahan tingali ang mga biktima ug ginagmay’ng hinabang kun ang tag-iya o mga tag-iya sa traysikad o habal-habal tubig-tubigan.

Apan mag-unsa man kun ang mga tag-iya niini igo lang makakaon og katulo sa usa ka adlaw? Sa pagka-tinuod ang traysikad ug habal-habal dako kaayo og kapuslanan ngadto sa mga lumolupyo sa kabukiran. Gumikan sa maong mga sakyanan ang mga biyahe o lakaw sa taga bukid mahimong mas masayon.

Busa tungod sa pagka-kinahanglanon niini, ang tanang kapunongan sa mga traysikad ug mga habal-habal maghiusa unya ilang hangyoon ang ilang tagsa-tagsa ka mga kongresista nga mopalabang og bili nga maglegalisar o maghatag og pagtugot sa mga traysikad ug habal-habal nga makapamasahero aron ma-safety sab ang mga kinabuhi sa naulahi.