Balik after five years!

Mao ni ang balibad sa usa ka empleyado sa buhatan sa senior citizens ning dakbayan sa usa ka senior citizen nga usa pa ka tuig nga nanimuyo ning dakbayan. Sa iyang tawag sa telepono sa Senior Citizens Hour sa DyRC, usa ka ginang mi-eksplikar nga ang iyang tuyo mao lang ang pag-secure og OSCA ID.

Apan, tungod lagi kay usa pa ka tuig ang iyang pagka-molupyo ning dakbayan gibalibaran siya tungod kay at least, lima ka tuig ang residence aron mo-qualify sa cash assistance.

Nakasabut siya niini, apan, daku ang iyang kahiubos sa tinubagan sa miatubang kaniya.

Kahibawo man ta nga kasagaran natong mga senior citizens, sensitive kaayo, dali kaayong mahiubos, daling masakitan, daling mangluod, daling saputon ug mubo kaayo’g pasiyensiya.

Busa, maoy gikinahanglan ang utmost patience and understanding sa muatubang kanila. Nahiubos siya the way she was “handled.” Nahauknol siya sa dihang gidispatsar siya pag-ingon nga: Balik lang after five years.

Basic courtesy ang gikinahanglan – bisa’g unsa nga opisina, especially when dealing with the elders. Mao nga ang unang buhaton ni Lando Llaguno, sa iya unyang pag-establish sa OSCA office, mao ang pagpili sa mga empleyado nga kamaong mo-smile taliwa sa kadaghang senior citizens nga mohasul ug magsamoksamok.

Samtang sa laing bahin, ang simultaneous nga pagpang-apod-apod sa cash assistance sa mga senior citizens sa miaging fiesta sa Inmaculada Concepcion, dakung nagmalampuson. Sa una, pag-ingon ni Mayor Mike Rama nga dunganon ang pagpanghatag, imposible kaayong paminawon. Apan, gawas nga nahimo ra, hapsay pa gyud.

Sa mga gagmay’ng barangay, half day ra ang distribution. In our case sa Guadalupe, ang kinadak-ang barangay sa Cebu City, orderly kaayo ang distribution. Gumikan sa among kadaghan. 16 ka disbursing officers ang gipalihok. Maoy hinungdan nga sa pagkaudto, mingawmingaw na. 

Miadto ko sa gym, mga alas 3:30 sa hapon, ug ako na lang usa ang gisilbihan. Sa ubang lamisa dihay pipila ka late comers, samtang sa uban, wala nay gi-entertain ang mga disbursing officers.

Hinoon, before I left the house, mi-text una ko ni Joy Quipit sa DSWS assigned sa Guadalupe pagpangutana kun samok pa ba. Mitubag siya nga OK na, mao pay akong pag-adto sa gym, ug hayahay kaayo ang akong pagkobra. Mao nay ginganlan og initiative.

Mao ni mahitabo kun molihok ug magtinabangay ang tanan. Nagtambayayong ang office of the mayor, treasurer’s office, ang mga barangay captain ug mga kawani sa barangay, ang PNP ug mga tanod, ang DSWS ug ang mga opisyales sa mga senior citizens mismo. Daghang personnel sa city hall ang gi-mobilize … busa, nagmalampuson ang tanan.

Congratulations kaninyong tanan, ilabina sa mga DOs nga way klarong noonbreak. Ug Belle, Jeffrey ug Jhun, kapoy ba?