Pista Senyor sad ang Pasko

Naay mga pamilya sa atong nasud nga saulogon niini ang Piyesta ni Sr. Sto. Niño dungan sa panahon sa kapaskohan.

Ang ilang rason mao nga ang Pasko maoy kapistahan sa pagkatawo sa Batang Hesus nga atong gitawag og Sto. Niño.

May mga pamilya didto sa Kabikolan, nga ang imahen ni Sr. Sto. Niño iprosisyon atol sa Disyembre 24 samtang ang nasud nga Pilipinhon naghikay sa ilang media noche.

Dinhi sa ato sa Sugbo naa say pipila ka mga pamilya nga magnobena ngadto sa Batang Hesus atol sa adlaw Niyang natawhan. “Dili man sayop ang pagsaulog sa Pista ni Sto. Niño atol sa kapistahan sa Pasko kay ang Niño Hesus mao may atong gipasidunggan atol sa kapaskohan,” suma pa ni Nanding Celino, lay minister.

Naa say mga pamilya nga mangadye ngadto sa Senyor inig bagting sa alas dose sa tungang gabii sa petsa 24 sa Disyembre.

Usa ka maestra sa kolehiyo nagkanayon nga ang iyang pamilya mopahigayon og novena alang sa Senyor siyam ka adlaw padung sa Disyembre 24.