Saari ang imong kaugalingon

Kabahin sa atong tawhanong kinabuhi nga mohimo kita og mga panaad. Apan kay lagi gumikan sa tawhanong limitasyon usab daghan sa atong mga panaad ang atong mapakyas. Nganong napakyas? Tungod kay walay igong kaisog ug determinasyon nga tumanon gyud ang maong saad. Sa laktud talawan ug haguka. Nahinumdom na nuon ko sa sealidang Three Idiots diin usa niini si Amir Khan kuyog sa iyang mga higala nga nag-eskwela. Usa kanila ang nahimong sentro sa ilang binarkadang yaga-yaga. Naanad kini nga siya mamahimong mas dato pa kay kanila. Tinuod man, sa sunod nilang panagtagbo, nahimo na siyang mas arangan pa kay sa uban bisan pa man kun siya gihapon naisahan. Hinuon nindot man ang katapusan sa sugilanon sanglit, nagkahugpong sila pagbalik ingon nga mga higala.

Ang makanunayong pagsaad sa kaugalingon alang sa usa ka tumong usa ka paagi sa pagkondisyon sa hunahuna ug kasingkasing nga mahimo ra gyud kaayo ang maong tinguha bisan sa mga kalisdanan ug babag. Kay kanunay nimong gihunahuna, ikaw maningkamot gyud. Maayo kini nga paagi aron buntugon ang mga negatibong pagbati apil na ang kahadlok nga maoy hinungdan nga dili na hinuon nimo kayahon ang imong pangandoy. Maayo ang mag-day dreaming labina nga luyo sa maong day dreaming anaa ang determinasyon nga tumanon gyud nimo kini.