Public Information Officer LGU-Barili

Karon nga mipagawas nag resulta ang Ombudsman Visayas kalabot sa ilang imbestigasyon kabahin sa kanhi Kap. Marcelo Baldomero ug sa iyang tresurera Marilyn Atillo sa barangay Kalubihan,Barili Cebu, kinsa gireklamo kalabot sa malversation of public funds niadto pang tuig 2009, matud pa sa maong ahensiya mahimo na kunong pasakaan og kaso ang duha kay napakyas sa pagmatuod nga sila mga inosente.

Senyales na ba kini nga makab-ot na sa maong barangay ang hustisya? O kutob ra dinhi ug wala’y kapa-ingnan ang maong kaso o basin maapil ang maong kaso sa dili na maihap nga sistema sa kurapsyon.

Kay matud sa maong ahensya ila nang girekomendar nga pasakaan nag kaso ang duha apan kining ubos ninyong higala kay lagi gustong masayod kinsa man ang mopasaka sa kaso? Ang barangay Kalubihan ba nga maoy iyang gidumala? Kay kung kutob ra sa pagrekomendar ug wala’y mokiha makaingon kita nga magpadayon ang kurapsyon dili lang sa mga barangay kun dili sa tanang ahensya sa gobiyerno.

Timan-i baya nga ang korapsyon maoy hinungdan kun nganong daghan sa atong mga kaigsuonan ang nangamatay sa kalisod.

Taas na og dag-anan ang maong kaso dili pa masiguro kun ang mga sinumbong makonbikto ba?

Sa laktud nga estorya wala pay kasiguroan kun makab-ot ba sa mga magbubuhis ang maong hustisya?

Ambot nganong daghan na sa atong mga kaigsuonan ang gustong mopahimulos sa kuwarta nga gikan sa buhis ug gipatuan sa singot sa katawhan.

Mga wala’y kaikog o delikadesa ilang gipakaon ang ilang mga pamilya sa kuwarta nga alang unta ibalik sa katawhan pinaagi sa mga proyekto, wala sila’y kahadlok nga gabaan, ang gaba raba dili magsaba ug nasayod ta nga ang tanan natong binuhatan atong pagabayran.