Dihang gihatagan si Presidente Aquino sa mandato sa katawhan niadtong 2010 election dala niya ang pasalig sa tul-id ug ligdong nga pamunoan.
Bisan sa pagtahap sa iyang katakos apan mas gipili sa katawhan ang paglaum nga iyang gisaad kay sa mas kalipikado nga kandidato tungod kay kadudahan ang ilang kaligdong ug integridad.
Apan sa gihimo ni Aquino niadtong Lunes nga pagpanginsulto sa Korte Suprema ug ni Chief Justice Reynato Corona nahadlok ko nga nasayop ang katawhan sa ilang pagsalig.
Ang kampanya sa "tuwid na daan" dili lang pulos paggukod sa mga kurakot sa atong gobyerno.
Kalakip niini ang disente nga pamatasan ug pagtahod sa mga institution sa gobyerno sama sa korte.
Ang lantaran niya nga pagpanginsulto ni Corona ug sa Korte Suprema naghatag og sayop nga senyas ngadto sa publiko.
Unsa may mahitabo kun ang publiko dili na motahod sa korte tungod sa ihemplo nga gihatag sa presidente.
Dili ba kagubot ang posible nga sangputanan niini? Unsaon naman lang og inay modangop sa korte kumkumon nalang sa mga kamot ang balaud niadtong mga biktima sa inhustisya tungod kay nituo sila sa ihemplo ni Aquino ug sa pamahayag niini nga wala silay hustisya nga makab-ot didto sa korte.
Kun wala nay salig si Aquino sa korte ug ni Corona dili kinahanglang iyang ipakita atubangan sa publiko nga makaguba sa institution.
Dunay paagi pinasubay sa balaud sama sa pagtangtang ni Corona pinaagi sa impeachment.
Nganong di man gamiton ni Aquino ang iyang impluwensiya sa kongreso ug Senado aron iduso ang impeachment ni Corona?
Ang iyang gihimo nagpakita sa iyang "immaturity."
Di sab mahimong taguan ni Aquino ang tataw niyang kapungot sa Korte Suprema tungod sa bag-o lang desisyon niini sa kaso batok sa Hacienda Luisita.
Tataw nga buot siyang manimawos sa korte pinaagi sa pagpakauwaw niini tungod sa kamanduan sa korte nga ipanghatag ngadto sa mga mag-uuma ang hacienda nga gipanag-iya sa ilang pamilya. Di madawat ni Aquino ang maong desisyon hinungdan nga mihimo siya sa usa ka lakang nga mahimo lang sa usa ka bata ug kuwang sa kabuot.
Mao nga dili na ko matingala kun dunay mga report nga na late si Aquino sa iyang appointment tungod kay nalingaw og pakigduwa og play station sa iyang pag-umangkon nga si Joshua.
* * *