May higot ba sa liog ang Korte Suprema?

May reserbasyon na ang katawhan sa pagkagawasnon sa Korte Suprema tungod sa sunod-sunod nga panghitabo. Ug sa tanan ang pinakadakong rason sa ilang reserbasyon mao ang hukom sa Korte Suprema sa kaso sa Hacienda Luisita nga gipanag-iya sa mga Cojuangco ug Aquino. Ang Korte Suprema mibaliktad sa nauna niining hukom nga nagtugot sa pagpahigayon og plebisito aron pilian sa mga mag-uuma ang pagpanag-iya og yuta o ang pagpanag-iya og certificate of stocks sa korporasyon.

Sa pinakauwahi niining hukom, ang Korte Suprema mimando sa pagpabahin-bahin sa yuta sa Hacienda Luisita ngadto sa mga mag-uuma nga nagtikad niini. Ang maong hukom migawas dayon human mapagawsi ug mapadakop sa kagamhanang Noynoy Aquino ang kanhi pangulo sa Pilipinas nga si Gloria Macapagal Arroyo tungod sa kasong election sabotage.

Ang katawhan nagduda nga mibawos lamang ang Korte Suprema ngadto kang pangulong Noynoy Aquino tungod sa pagpadakop ug wala pagtugot kang Gloria Arroyo nga makasibat paingon ngadto sa gawas sa nasud. Ang Korte Suprema man ugod gipangulohan ni Chief Justice Renato Corona nga suod ni Gloria. Si Chief Justice Renato Corona sa wala pa matudlo sa Korte Suprema taud-taud nang nag-alagad ni Gloria, una isip iyang Chief of Staff, gitudlo pagka Associate Justice ug sa wala pa mopahawa sa katungdanan gidali-dali pagtudlo isip Chief Justice sa Korte Suprema si Corona.

Ang mga militanting grupo sa ilang gihimong pagtoon kun giunsa sa pagbotar sa Chief Justice sa mga mahinungdanon kaayong mga kaso diin si kanhi pangulong Gloria Macapagal Arroyo ang gireklamo, nakadiskobre nga sa 19 ka mga kaso batok sa kanhi pangulo, 15 niini ang boto nga mipabor ni Gloria. Kini ang ilang gibasihan sa ilang panawagan sa pagpa-inhibit ni Chief Justice Renato Corona sa mga kaso ni Gloria Macapagal Arroyo.

Halos tanang sakop sa Korte Suprema mga tinudlo ni Gloria. Mao kaha kini ang hinungdan nganong kanunay nga nakapabor si Gloria? Hiniktan ba sa gitawag og utang kabubut-on ang liog sa mga hurado sa Korte Suprema? Sa ilang paghukom sa kaso sa tawong nagbutang kanila sa puwesto, gibasi pa ba nila kini sa merito sa kaso o gibasi na lamang sa gitawag og utang kabubut-on? Nangutana lang!