Usa ka importante karong adlawa sa among fraternity, ang Alpha Theta Omega o Althonians. Kini tungod kay magsaulog na usab kami sa anibersaryo sa pagkahimugso niini.
Liboan ka mga Althonians sa tibuok kalibotan ang maghugpong karong adlawa alang niining dako ug mahinungdanon nga kasaulogan. Naandan na sa mga Althonians nga matag anibersaryo, dili gayud sila malimot sa pagtapok asa mang nasud sila nahimutang karon.
Hinuon aduna kami website ug yahoo e-groups nga dali ra namong madangpan alang sa impormasyon mahitungod sa mga kalihokan sa among grupo. Maong dili lisod sa mga Althonians bisan asang suoka sa kalibotan ang pag-communicate mahitungod sa mga kalamboan sa grupo.
Dinhi sa Sugbo, ang kasaulogan adto pagahimuon sa usa ka beach resort sa dakbayan sa Sugbo. Naandan na nga adto sa beach resort kini ipahigayon gumikan lagi kay adunay mga pamilya ang ubang mga miyembro nga buot usab moduyog sa kasaulogan.
Daghan sa mga miyembro sa Althonians gikan sa Bohol, Negros, Samar, Leyte ug pipila ka mga probinsiya didto sa Mindanao ang motambong sa kalihokan dinhi sa Sugbo. Adunay pipila nga gusto anhi sa Sugbo mosaulog aron paghimamat sa mga kaigsuonan dinhi.
Hinuon kadtong mga sakop nga taga laing lugar sa nasud nga ania nagtrabaho ug nanimuyo sa Sugbo, anhi na moselebrar sa maong kasaulogan. Sama kanako nga lumad nga taga Zamboanga del Sur. Sa pipila ka tuig na nakong nanimuyo dinhi sa Sugbo, naanad na kong anhi na moduyog sa selebrasyon.
Alegre karong adlawa ang among selebrasyon. Kini tungod kay mag-abot ang mga tang-an sa among organisasyon dinhi sa Sugbo. Kadtong mga karaan sa mga chapter dinhi sa Sugbo siguradong motambong usab sa maong selebrasyon aron sa paghimamat sa ubang mga kaigsoonan.
Hinaut nga magmalampuson ang selebrasyon sa tanang chapter sa Alpha Theta Omega sa tibuok kalibotan karon adlawa. Kini aron sa ingon nga mas mabulokon pa ang atong pagselebrar sa sunod nga mga katuigan.
* **
Sa nakalabay’ng 26th Southeast Asian Games didto sa Indonesia, nag-aginod gihapon ang Pilipinas sa medal tally. Sa nakuhang 36 ka medalyang bulawan, ikaunom lamang ang nasud sa 11 ka nasud sa Southeast Asia nga nakigtigi sa maong kompetisyon.
Makauulaw kining gidangatan sa Pilipinas karon. Sa populasyon nga hapit na moabot sa usa ka gatus ka milyon, angay unta nga ang nasud nanguna sa maong SEA Games.
Apan unsay problema sa Philippine sports? Nganong mamunbon man gayud ang mga Pinoy sa internasyonal nga kompetisyon? Gani wala pa gyud kita makasungkit sa atong gidamgo’ng Olympic gold.
Hinuon daan nang kulang sa suporta ang kagamhanan sa atong mga atleta. Gamay nang daan sila’g madawat nga suportang pinansiyal, anaa pa gyud nagpuyo ang atong mga atleta sa mga sports facilities nga karaan ug hugaw hinungdan nga maapektahan gayud ang ilang training.
Pun-an pa sa mga opisyal nga magsige og away. Kini ang hinungdan ngano nga wala gayuy ayo ang sitwasyon sa paugnat sa kusog sa Pilipinas.
* * *
Email: yacilam@yahoo.com