Human sa taas nga katuigan nga pagpaabot maangkon na kapin sa 6 mil ka mga mag-uuma sa Hacienda Luisita ang luna nga ilang gitikad ubos sa Comprehensive Agrarian Reform Program sa atong gobyerno.
Kini human ang Korte Suprema mimando na pag-apud-apod sa dul-an sa 5 mil ektaryas nga hacienda sa pamilya ni Presidente Benigno Aquino III ngadto sa mga trabahante niini.
Sa 56 ka pahina nga desisyon, gibakwi sa taas nga hukmanan ang unang option nga gihatag sa korte alang sa mga trabahante nga modawat lang og shares of stocks inay nga kuhaon gyud ang posisyon sa luna.
Nagka-uyon ang tanang mahistrado sa Korte Suprema nga ihatag sa 6,296 ka mga original beneficiaries ang luna pinasubay sa kamanduan sa Presidential Agrarian Reform Council kon PARC niadtong Disyembre.
Ambot sulagma ba lang ang pagpagawas sa desisyon sa korte nga gidominar sa mga tinudlo ni kanhi presidente Gloria Macapagal Arroyo sa iya karong gidangatan nga paglutos sa administrasyon ni Aquino o usa ni sa paagi sa pagpanimawos ngadto sa presidente?
Wala may mamahimong ibawos ang kampo ni Arroyo sa pag-ipit niya sa administrasyong Aquino gawas lang sa kaso sa Hacienda Luisita diin siguradong maapektuhan ang presidente.
Nabutang sa apeke ang presidente niining maong desisyon tungod kay interest sa iyang pamilya ang nasugal sa maong kamanduan. Dinhi masukod kun matinud-anon ba siya sa iyang giingong “social covenant” nga iyang gisudlan uban sa katawhan.
Dinhi masukod kun unsay mas importante ni PNoy, ang interest sa iyang pamilya o ang interest sa hustisya, balaud ug katawhan? Hinaut nga niining tungara mosunod na si PNoy sa mando sa korte ug dili isalikway sama sa iyang gihimo sa TRO batok sa watch list order sa mga Arroyo.
* * *
Ang deputy commissioner for intelligence nga si Danilo Lim mipasalig nga kutob nalang sa Disyembre dinhi sa Sugbo ang duha ka mga opisyal sa Customs Intelligence and Investigation Service nga labihan ka mga taspukan sa ilang katungdanan.
Sila si CIIS chief Bong Arevalo ug ang Visayas supervisor niini nga si Lyceo Martinez gireklamo sa sayo pa nga kun dili Huwebes, Biyernes na ni nga mo-report sa ilang opisina.
Gawas nga hapit na mahuman ang semana mo-report sa trabaho labihan pa ka luho sa lifestyle niini. Toyota Prado ang service ug anaa magpuyo sa Radisson Blu Hotel.
Karong bag-o usa ka kargamento sa mga pusil gikan sa Amerika ang nasakmit sa mga opisyal sa aduana. Apan ang maong kalampusan mahulagway nga sulagma lang dihang nasigpatan sa x-ray.
Way intelligence report may labot niini tungod kay unsaon wa man magtrabaho ang duha ka mga opisyal nga maoy gitahasan niini.
***