Pangitaa kinsay smuggler

Bantayan nato asa padulong ang imbestigasyon sa Bureau of Customs batok sa shipper, importer, personero ug broker niadtong kargamento nga unom ka motor ug mga piyesa ug bala sa armas gikan sa Amerika.

Nahibaw-an man sa mga tinugyanan sa adwana nga kadtong Renato Ramos nga consignee sa kargamento usa ka peke (fictitious) nga consignee. Unya nahibaw-an man nga ang nag-proseso sa mga papeles niini mao man si Nelson Arnoco, busa mahibaw-an mismo gikan kang Arnoco kinsa kini si "Way-Way" nga maoy tinuod nga nag-import sa maong mga motor ug mga bala ug piyesa sa armas.

Kun dili mailhan, ang angay paninglan sa maong salaod mao mismo si Arnoco.

Ang shipper sa maong kargamento nga usa ka Rey Tagaloguin yawe usab sa pag-ila kinsay smuggler sa maong motor ug mga gun parts. Bahala'g ma-tagalog o ma-bisaya pa, basta angayan gyud siyang patubagon.

Sa miaging Lunes nga Tikdol, atong gisulat nga angay usab patubagon ang examiner sa maong kargamento.

Nagtuo ko nga wala eksamina ni Rabel ang kargamento o ang gihimo niini mao ang "table examination."

Tahas na sa mga imbestigador sa gobyerno ang pagdeterminar kun nagkunsabo ba o wala si Arnoco ug Rabel kay kun wala pa ang X-ray Inspection Project nga gipanguluhan ni Atty. Ma. Lourdes Mangaoang ug sa Customs Police, makalusot na ra ba unta gyud ang maong kargamento nga apil ang mga kontrabando.

Bisan gani ang Wharfinger's Office wala makatiktik sa unom ka mga motor ug mga kontrabandong bala ug piyesa sa armas. May report hinuon kong nadawat nga kini si Arnoco magpirmehan sa Wharfinger's Office ug mag-estambayan uban sa pipila ka sakop sa media.

Angay usab susihon sa mga imbestigador kinsay gipangduol ni Arnoco kay malagmit, miapil sila sa pagdesinyo nga dili malili-an ang ilang pagpayuhot sa mga motor ug mga gun parts ug mga bala.

* * *

Kun ako’y sakop sa pamilyang Arroyo, dili na lang tingale ko magsupaksupak sa mga proseso nga gihimo sa administrasyong Aquino aron mataral ug masilotan ang mga kurakot sa miaging administrasyon.

Tipik man sa programa sa gobyerno ang paggukod sa mga kurakot, dungan ang pagpatuman sa mga programa nga mag-undang na sa pagpanikas, ilabi na sa mga ahensiya sa gobyerno.

Makasaway unta kita nganong gi-target sa pagpanggukod ang kanhi unang pamilya nga Arroyo kun dili pa seryoso ang kasamtangang gobyerno sa mga anti-corruption program niini. Apan gikan sa presidente ngadto sa iyang mga kalihim gibaoran ni Noynoy Aquino sa pagsunod sa iyang "Matuwid na Daan".

Sa ato pa, mosupaksupak gani kita, kinahanglang limpyo ta. Sumala pa sa Bibliya, kinsa kadto walay sala maoy unang mobato. Busa kinsa kadtong limpyo, dili kurakot ug sinsero nga opisyal sa administrasyon nga Arroyo maoy angay unang mobato sa administrasyong Aquino.

Ang nakanindot niini, hasta ang president limpyo man ug dili kurakot.

Hinuon, adunay nanggawas nga mga report nga mga paryente lamang ni Noynoy ang nabulahan niining administrasyona. Mao bitaw nga buhi hangtod karon ang giangga nila sa una nga "family incorporated" kay ang mga pamilyang Cojuangco ra man ug mga suod niini ang nabulahan sa administrasyon kanhi ni anhing Cory Aquino.

Pero mao man gud na ang giingon sa uban nga mas maayo na lang na kay sa klaroklaro gyud nga pagpangawat sa presidente, bana niini, ug mga anak.