Kinsa kahay mosunod? Pangutana kini nga salabtunon kaayo tungod kay ang tawo , tawo gyud nga lisud kaayong mapugngan sa iyang gustong buhaton.
Bisan nasayud na siya nga dautan ang iyang buhaton ug bug-at nga silot ang iyang padulngan, gusto gyud niyang testingan.
Ang unang presidente sa nasud nga nakatilaw og panghimaraot sa katawhan mao si anhing Presidente Marcos.
Ika-duha si kanhi Presidente Estrada, pero di panghimaraot sa katawhan kundi silot sa hukmanan.
Ang ika-tulo, si kanhi Presidente Arroyo, ambot kun kinsay ika-upat. Mao kini atong bantayan.
Mao lagi kining hunahuna sa tawo nga gusto gyung testingan ang paglapas sa balaod luyo sa kasayoran nga silotanan siya sa pagbuhat sa ingon, unya inig-abot sa panahon, gusto nang moikyas aron makalikay sa silot, unya kun wa na gyuy kaikyasan kay madakpan, aw maoy pag-ingnon, ulahi na ang tanan ug igo ra gyud ang tawo sa pagbasol.
Hinuon kun silot lang sa gobyerno sa yuta ang hisgotan, aw sisiw ra kaayo ni, buot ipasabot nga gaan ra kaayo , kay inigkamatay sa tawo nga mapriso sa tibuok kinabuhi, aw impas man ang tanan.
Apan ang nakapait kay nahisulat na sa Balaang Kasulatan, ang libro sa mga pulong sa Dios, ang Dios nga maoy mipahibawo sa mga tawo kaniadto nga lunopan Niya ang yuta ug natuman gyud sa panahon ni Noe diin walo ra ka tawo ang nasalbar uban sa mga mananap nga mas gikaluy-an pa sa Dios kay sa mga tawong wa motuo sa Iyang mga pulong.
Apan sisiw ra gihapon to, kay pagkalumos sa tawo sa tubig unya mihubas usab ang maong tuig, aw impas man ang tanan, apan ang pait kay kining umaabot nga kayo nga palangoyan sa Dios sa tawo sa adlaw sa paghukom, kay di man mapawong ug di na usab mamatay ang tawo nga Iyang sangagon didto, daghan baya tingale ang motesting niini. Murag joke no? Di ba?