Unsay gidalian?

Natabunan ang kadaugan ni Manny Pacquiao sa laing kontrobersiyang gisangitan ni kanhi presidente Gloria Macapagal Arroyo. Ning higayona, ang pagdali-dali sa kanhi presidente ug sa iyang bana nga makagawas sa nasud aron didto makapatambal. Katingalahan kaayo nganong nagpa-book na og lima ka flight ang managtiayon bisan kun wala pa mopagawas sa Temporary Restraining Order ang labaw nga hukmanan. Ug sa dihang nipagawas na og TRO ang Korte Suprema, paspas pa sa kilat nga niabot sa tugpahanan si Arroyo aron makabiya paingon sa Singapore. Ang labing dakong pangutana, unsay gidalian sa magtiayon nga makabiya sa nasud?

Simpleng tubag sa turotot ni Arroyo nga si Elena Bautista Horn, adunay naka-schedule nang daan nga check-up ang kanhi presidente karong adlawa didto sa Singapore. Ang pangutana, nganong nagpa-schedule namang daan si Arroyo og check-up nga wala pa may kasigurohan ang iyang pagbiya sa nasud? Kinsa naghatag nila og kasigurohan nga makabiya gyud sa nasud ug makaabot sa iyang gipa-schedule nang daan nga check-up? Mas pa hinuon ning nipalawom sa atong pagduda nga adunay mas lawom nga tumong ang mga Arroyo gawas sa ilang pagpatambal kun ngano ingon og sa nakaplastada na ang tanan bisan wa’ pa mogawas ang TRO sa Korte Suprema.

Giladlad nang daan ang tanang alternatibong mahimo sa mga Arroyo aron makapatambal unta sa maong sakit. Gawas nga adunay daghang maayong tambalanan dinhi sa nasud, aduna pay mga doktor nga nipasalig nga mahimo ra nila kaayo ang pagtambal sa kanhi presidente sa nasud. Bisan ang Malacanang nitanyag pa nga maoy mobayad sa mga doktor nga buot kuhaon ni Mrs. Arroyo aron lang gyud dili siya mobiya sa nasud. Apan gipamugos gyud sa pamilyang Arroyo nga biyaan ang nasud aron didto magpatambal. Nailad na ‘tang daan ni Arroyo atol sa iyang kwestyonableng termino kaniadto, andam na ba ‘sab ta nga magpailad sa kanhi kwestyonableng lider?

Niabot si Mrs. Arroyo sa NAIA niadtong miaging gabii sakay sa ambulansya ug giguyod sa wheelchair. Wa’y make-up, nagluya, daot ug klarong nanghubag ang eyebugs nga niatubang sa media ug sa mga tawo si Mrs. Arroyo. Makaluluoy kun imong tan-awon. Apan dili ni mao ang punto. Ang punto mao, angayan bang mobiya sa nasud ang usa ka tawo nga nag-atubang og mga makalilisang nga kaso sama sa pagpangawkaw og binilyon ka pesos ug pagpangilad sa miaging mga piniliay? Nganong ipatuman man ang pagbiyahe sa usa ka tawo bugti sa interes ug sa gipanawagan nga hustisya sa kinabag-an sa mga Pilipino?

Matod sa kampo ni Mrs. Arroyo, mobalik ra sa Pilipinas ang kanhi lider. Ang pangutana, kanus-a siya mobalik dinhi sa nasud? Unya na kung mahuman na ang termino ni Presidente Noynoy Aquino? Unya na kung sigurado siyang mohulip sa Malacanang mahimo rang mopasaylo sa iyang mga kasaypanan ug motabon sa mga pasangil nga gipasaka batok niya? Unya na siya mobalik kung makalimtan na sa kinabag-an sa mga tawo ang iyang mga atraso? Matod sa konstitusyon, katungod ni bisan kinsa ang pagbiyahe gawas sa nasud. Kung ako ang pasultihon, palargahon si Arroyo—way problema. Apan adunay daghang kasong giatubang ang kanhi presidente ug angayan ni niyang atubangon tungod kay mao ni atong gipangita-- hustisya sa mga kabuang nga nahimo atol sa iyang pamunoan.

Sa kadaghan sa mga kasong gisagubang ni Mrs. Arroyo, unsa pa may rason nga mobalik ka sa nasud? Sa pagka-matinud-anon sa administrasyong Aquino paggukod sa mga kawatan sa gobyerno, kinsa may kawatan nga di’ mahadlok sa posibleng sangputanan sa iyang kaso labi pa kung sad-an siya. Mas bug-at ang rason nga molayas ug di’ na mobalik si Mrs. Arroyo itandi sa kahimtang sa iyang panlawas.

* * *

Email: [email protected] or [email protected]