Hain na kaha ron si Ecleo

Sa miaging semana migawas sa pamantalaan nga nakit-an sa dakbayan sa Talisay si Kongresista Ruben Ecleo. Kini human mogawas sa balita nga girekomendar sa director sa Criminal Investigation and Detection Group ngadto sa labaw sa kapolisan nga patungan og salapi ang ulo sa kongresista aron madasig ang mga tawo nga nakakita kaniya sa pagsulti ngadto sa mga awtoridad aron madakpan ang kongresista.

Human sa pakulo sa Criminal Investigation and Detection Group, mipakita usab sa ilang interest ang Central Command. Ila usab kunong dakpon ang kongresista kun ilang makit-an nga magsuroy-suroy dinhi sa Central Visayas. Samtang si Atty. Kit Enriquez ang abogado sa prosecution wala upod maglangay, giawhag usab niya dayon ang gobernadora sa Sugbo sa paggahin og salapi aron ipatong sa ulo sa kongresista. Salamat na lang kay wala mosanong ug wala magpadala sa hulhog sa abogado ang gobernadora.

Samtang nagkadugay, nagkalami ug nagka OA o over acting na kining kaso ni Kongresista Ruben Ecleo. Samtang nagkadugay naklaro na nato nga ang kaso ni Ecleo gihimo lang sa uban nga sakyanan aron sila mosikat o mosamot sa pagsikat ug gipasagdan ang pag irog sa kaso.

Kun gusto gyod sa prosecution nga mapadali ang pagkasikop ni Kongresista Ruben Ecleo, nganong dili man nila porsigihon ang kapolisan nga pangitaon ug dakpon ang kongresista? Kun gusto gyod sa prosecution nga madakpan ang kongresista, nganong dili man nila porsigihon ang Department of Justice aron gamiton ang mga galamay niini sa pagpangita ni Ecleo? Nganong wala man sila magpatabang ni Secretary Delima aron palihokon niini ang NBI ug ang ilang mga galamay sa pagpanigta sa kongresista? Nganong hilom man sila mahitungod niini? Seguro nakauyon na lang upod ang prosecution nga dili makit-an ug madakpan si Kongresista Ruben Ecleo Jr.. Kun unsay rason, sila lamang ang nasayod.

Pero ako nagduda nga kining tanan kabahin lamang sa taktika sa prosecution nga paglingla sa publiko. Ako nagduda nga gikondisyon nang daan sa prosecution ang katawhan nga nagsunod ning kaso sa kongresista aron dili sila atakihon sa katawhan nga masuko kun mapildi sila sa kaso. Sa ako nang giingon kaniadto ug usbon nako kini karon nga ang kaso ni Ecleo lisod pamatud-an tungod kay mga sirkumstansiya lamang ang ebidensiya nga gihuptan sa prosecution. Wala gayoy direkta nga ebidensiya batok sa kongresista mao nang nanagana segurong daan ang prosecution sa unsa may moabot sa unahan ilabi na nga gibarugan gayod sa depensa nga inosente ang ilang kliyente. Pero kadiyot sa, hain na kaha ron si Kongresista Ruben Ecleo?