Ang pagtugot kang Arroyo nga makagawas

Ang pagmagahi sa Department of Justice sa paghatag og higayon kang kanhi Presidente Arroyo aron makapa-opera sa sakit sa bukog sa gawas sa nasud murag nag-anam na og kalanay karong milihok na si Senador Juan Ponce Enrile sa pagpasabot sa dakong panginahanglan nga ma-operahan gyud ang kanhi lider sa Pilipinas.

Kay ang kahimtang kuno sa liog sa kanhi pamuno nasud tandugon kaayo nga sama sa usa ka bomba nga matandog lang og dyutay moulbo, busa ang gitawag nga humanitarian reason mao karon ang gitimbangtimbang sa DOJ kun angay ba o dili sagupon.

Kun talibuto ba gyung tinuod o dili, ug kun tua na sa gawas mobalik pa ba nganhi sa nasud o dili, ilabi na nga mibaniog ang balita nga nangayo na og political asylum si Arroyo.

Sa laing bahin kun moulbo gayud usab nga mahimong hinungdan sa iyang katapusan, di man sab angay basulon  ang DOJ kay ang tinuod Dios ra bayay makabuot sa kamatayon sa tawo tungod kay Siya may tag-iya sa atong   kinabuhi.

Hinuon sama kang Kongresista Ruben Ecleo nga gihimadlan usab sa iyang doctor nga sama sa bomba nga talibuto na niadtong gibilanggo pa siya,   buot ipasabot maimpas kun di pagawason sa prisohan aron matambalan, aw di anaa na siya sa hayahay nga kahimtang karon. Ang tawo, tawo raman gud nga dali kaayo matahap ilabi na kun may nahauna nang panghitabo ilabi na kun mahinumdoman ang estorya ni Matsing ug ni Pagong.

Si Pagong nga migamit sa iyang utok, dihang giapiki na siya ni Matsing kay nadakpan na siya, pag-ingon ni Matsing nga ilabay siya sa tubig kay maldito kaayo, nagpakiluoy gyud siya nga di siya palabay kay malumos siya.

Sa pagtuo ni Matsing nga tinuod ang gisulti sa bao, aw gilabay niya kining tinuod sa tubig.

Unya sa didto na sa tubig si Pagong, unsa man namatay siya? Ah wa oi, puwerting katawaa niya kay nailad niya sa makausa pa si Matsing.

Kun nahitabo man kini kang Ecleo, wa kahay posibilidad nga mahisama niini si Madam Arroyo sa higayong tugotan siya nga makagawas sa nasud? Di ba?

Plate numbers

Ni Rene U. Borromeo

Ang plate number sa usa ka sakyanan giisip kini nga maoy iyang ID aron mailhan sa kadaghanan, apan dunay mga tawo nga wala makasabot kun ngano nga ang usa ka sakyanan aduna niini.

Ang uban nga mga higala nato sa intelligence community migamit og mga plate numbers nga giisip nga confidential plate, sa ato pa dili kini basta-basta nga mabutyag ang mga detalyi sa tag-iya sama sa ubang mga sakyanan.

Gitug-anan ko ni Bimboy Arnaiz, organic law enforcer sa Land Transportation Office (LTO) nga gidakop niya ang tag-iya og kotse nga taga Mandaue kay gitangtang ang plate numbers niini sa atubangan ug giilisan og commemorative plate nga “NBI 75.”

Dugay na kaayo nga ang LTO, pinaagi sa media, nagpahibalo sa publiko nga ang pagtaud og commemorative plate nga itabon sa orihinal niini nga plate number sa sakyanan, labaw na og expire, dakung sayop.

Ang LTO usa lang sa mga sanga nga ahensya ubos sa Department of Transportation and Communication (DOTC). Ang DOTC, kaniadtong Hulyo 20, 2009, mipagawas og memorandum kabahin sa paggamit og commemorative plate sa sakyanan.

Gitataw g’yud sa DOTC nga ang orihinal nga plate numbers sa sakyanan dili mahimong tabonan sa commemorative plates kay kalapasan kini sa Section 3 © sa Memorandum Order No. 405, Series of 1996.

Gawas niini nga lagda, ang DOTC Secretary kaniadto nga si Leandro Mendoza, mitataw g’yud nga ang pagtabon sa orihinal nga plate numbers kalapasan sa lagda nga gilatid sa Section 18 sa Republic Act 4136 kon Land Transportation and Traffic Code.

Ang Section 3 © sa Memorandum Order 405 klaro kaayo nga nag-ingon “The commemorative plate shall not be used in place of the regular plate. As such, the display of the latter in the motor vehicle shall be maintained in the space provided for the purpose even during the period of use of a commemorative plate.”

Unya, unsa may gilatid sa Section 18 sa Republic Act 4136? Ang maong balaud nagkanayon “At all times, every motor vehicle shall display in conspicuous places, one in front and one in the rear thereof, the said number plates.”

Gawas ana giklaro g’yud sa balaud nga ang plate numbers kinahanglang kanunay’ng limpyohan ug atimanon. Mao bitaw nga kun daginiton, daghang mga drayber ang madakpan tungod sa wala pag-atiman sa ilang plate numbers or “dilapidated plates.”

“The number plates shall be kept clean and cared for, and shall be firmly affixed to the motor vehicle in such a manner as will make it entirely visible and always legible.”

Apan ang ubang mga tag-iya og sakyanan wala motuman niining maong balaud. Mahimo tingali nga wala sila masayud o kaha mahimong abusado lang g’yud sila o nanghambog sa mga litra nga nabutang sa ilang pinalit nga commemorative plates.

Dinhi sa ato, daghan kaayo nga mga sakyanan nga ang mga tag-iya migamit og NBI-75, PMA-PNPA, COUNCILOR, MAYOR, GOVERNOR, LEAP ug daghan pa.

Walay nagpugong sa pagtaud ana apan ibutang sa ibabaw o kaha tupad sa inyong orihinal nga plate numbers ug ayaw itabon.

Ambot si Mayor Michael Rama, kusog kaayo moingon nga tul-iron kuno niya ang hiwi apan kutob ra man sa sulti kay ang iyang sakyanan ang plaka sa atubangan MAYOR man. Basin og inigkabasa niya niini magbag-o na siya.