Ang taksanan sa kaugalingon

Si Rene Descartes ang nagkanayon: “COGITO ERGO SUM” o I think therefore I am. Dili ikalimod nga naa ang mga head level nga mga tawo. Kadtong mga intellectuals o nangindahay nga mamahimong usa kanila. Kining mga tawhana ang kanunay lang mag-analyze sa mga panghitabo sa ilang palibot. Apan ang pangutana mao: “Nakaako ba sila pag-analyze sa ilang kaugalingon?” Kun mag-analyze sila, objective gyud kaha ang ilang analysis? Dili nato masikop ang tubag sanglit, sila ang bugtong nasayod lamang.

Dili nato mahimong ihiklin ang atong kaugalingon ingon nga espirituhanon ug pisikal nga linalang. Dili kini kwestiyon lang kun giunsa nato pagpangutana ang atong kaugalingong kahimtang. Kwestiyon usab kini kun giunsa nato pagtagamtam ang atong pagka-kita mismo sa konteksto sa atong pisikal nga kahimtang ug sa atong kasamtangang kasinatian. Daghan kanato ang lubong gihapon sa kagahapon ug labaw na nga daghan nato ang nilantaw sa umaabot. Hangtud nga dili na hinuon kita malipay sa kasamtangan.

Tinuod dunay pagbati o relasyon nga nahimong supak sa gilatid nga han-ay sa kinaiyahan ug sa gipanday nga balaod. Apan wala kini magpasabot nga ang maong relasyon abnormal o ang tawo maoy nakapa-abnormal sa laing tawo. Lisud ang dili anad sa nagkausab-usab nga bayhon sa kalibutanong pakiglambigit kay seguro gyung kalibog, kasakit, ug kapait ang mahiagoman gikan sa imong gihigugma kang kansang pagsalig imong gihatag ang kinatibuk-an sa imong pagka-ikaw. Pokus sa imong kaugalingon ug susiha kun asa ka dapita naglihok. Nilihok ka ba kay maoy sugyot sa mga tawo nga maoy imong lihokon? O nilihok ka ba kay maoy sugyot mismo sa imong kaugalingong hunahuna ug gidasonan sa imong kasingkasing?