Substandard nga imported

Ania na usab kita sa panahon sa atong pagsaulog sa Pasko ug taliwala sa matag karon ug unya nga pag-ulan-ulan maoy atong masinati ang hilabihan nga kainit sa panahon sa higayon nga mopakita ang adlaw kun moiway gikan niini ang nagtabon nga panganod.

Sa atong pagsaulog sa Pasko maoy atong naandan nga kinaiya ang pagpahimutang og nagkadaiyang dayan-dayan nga alang kanato makahatag og kamabulokon sa maong kasaulogan.

Naglakip sa atong paliton nga dayan-dayan mao ang mga series lights nga atong ikutay sa pagpahimutang sa palibot sa atong balay, sa bintana ug pultahan gawas kay lagi dili pa man paigo alang kanato ang gipabarog nga Christmas Tree ug gibitay nga mga parol.

Niining maong adlaw sa atong pagsaulog sa Pasko angay natong mahinumdoman nga ang pag-amping ilabi na sa atong pagpalit og mga series lights nga substandard nga maoy makaingon sa trahedya sa sunog.

Nauso na man god karon ang imported nga mga butang nga maoy atong paliton gikan sa nagkadaiyang dagkong tindahan niining dakbayan.

Daghan na kaayo ang mga taho nga ang maong mga substandard nga series lights, electric fan o mga ceiling fan maoy nag-unang hinungdan sa sunog tungod kay dali kaayo kining moboto ug magmugna og kalayo nga maoy makaingon sa trahedya sa sunog.

Ang buhatan sa Department of Trade and Industry (DTI) maoy gitahasan sa pag-monitor sa mga produkto nga gibaligya sa atong tindahan.

Ang ilang tahas sa atong goberno dili lang ang pag-monitor sa tukmang presyo kun dili lakip na usab ang kalidad niini.

Ang DTI miingon nga ang dili substandard nga mga butang nga gibaligya sa mga tindahan nga naglakip na sa mga imported adunay tatak gikan sa ilang buhatan nga nagpasabot luwas kini sa paggamit sa makapalit kay dili kini substandards.